Ինչպես արդեն գիտեք, հոկտեմբերի 23-ից, ԼՂՀ «Գանձասար» ճամբարում կմեկնարկի հերթական հավաքը, որը դառնում է ավանդական: Անցյալ տարի այս հավաքին մասնակցեցին մեդիօլիմպիադայի հաղթողները, ովքեր ներկայացված էին հայաստանյան և արցախյան 14 կրթական հաստատություններից: Այս տարի ճամբարային հավաքի բովանդակությունը մի փոքր այլ կլինի: Կներկայացվեն կրթահամալիրում գործող ակումբները, ակումբային գործունեության կազմակերպումը և դրա արդյունավետությունը կրթական գործընթացում: Հավաքի ընթացքում կկազմվի «ֆորմալ և ոչ ֆորմալ կրթություն» թեմայով ուսումնական փաթեթ, որի վերաբերյալ արդեն եղել է մեկ հրապարակում, որին կարող եք ծանոթանալ «Դպիր» էլեկտրոնային պարբերականում: Արցախյան ճամբարի ուղեգրեր ստանում են տարվա ընթացքում լավագուն ուսումնական արդյունքներ ունեցող սովորողները, ովքեր մասնակցել են մեդիաօլիմպիադաներին, ուսումնական նախագծերի:
Հավաքի ժամանակ, հատուկ կներկայանա «Ասպետ» ռազմամարզական ճամբարը` որպես ռազմական ակումբի օրինակ: Կրթահամալիրից կներկայացվեն 10 ակումբներ, որոնցից յուրաքանչյուրն իր հետ Արցախ է տանում հետաքրքիր և բազմաբովանդակ ծրագիր:
Հավաքի ամբողջ ընթացքում Վանք գյուղի բնակիչների և հյուրերի համար կգործեն կրթահամալիրի թվային աստղացուցարանը և աստղադիտարանը: Կկազմակերպվեն ինտելեկտուալ մրցաշարեր, ներկայացումներ, բանավեճեր, խաղարկային դատ, կինոդիտումներ, ռազմական միջոցառումներ, ռոբոտների ցուցադրություն, արշավներ ու նմանատիպ բազմաթիվ հետաքրքիր իրողություններ: Նրանք ովքեր չեն կարողանա մասնակցել այս տարի, թող այս պահից սկսած պայքարեն հաջորդ հավաքին իրենց տեղն ունենալու համար:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
