Կկուն և թռչունները ( հեքիաթ փոքրիկների համար)
Անտառի կողքին մի գեղեցիկ լճակ կար: Հորդառատ անձրևներից այն շատ էր պղտորվել, ամենուր տիղմ էր ու տերևներ, ծառի կոտրված ճյուղեր ու կեղտ:
Հավաքվեցին թռչունները ու որոշեցին մաքրել լճակն ու նրա շրջակայքը: Եկան բոլոր թռչունները, իսկ կկուն չկար ու չկար: Գնացին ետևից:
-Պա′հ, ես իմ մաքուր ոտքերը ձեր կեղտոտ լճում չեմ կեղտոտի,-պատասխանեց կկուն: - Ժայռերի վրա շատ մաքուր ջրափոսեր կան, ինձանից հեռո′ւ:
-Վարվի′ր, ինչպես կուզես: Միայն մտքովդ չանցնի մոտենալ մեր լճին,-զգուշացրին նրան:
Եվ թռչունները մաքրեցին լիճը կեղտից, հատակը լցրին խոշոր խճաքարերով, և լիճը դարձավ ջինջ ու մաքուր: Սկսվեցին շոգերը, ջրափոսերը ցամաքեցին, և կկվի համար սկսվեցին սև օրեր: Մոտակայքում ջուր չկար,իսկ կկվի ձագուկները ծարավ էին և ջրի կարիք էին զգում: Հենց ինքը` կկուն էլ տառապում էր ծարավից: Մի գիշեր նա վերցրեց սափորը, թաքուն մոտեցավ լճին: Բայց հանկարծ հայտնվեցին թռչունները և թույլ չտվեցին ջուր վերցնել:
-Բա′ց թողեք ինձ, բաց թողեք հանուն փոքրիկ ճուտիկներիս,-աղաչում էր կկուն:- Թող իմ ոտքերը միշտ պատված լինեն կեղտով, բայց հաջորդ անգամ ես առաջինը կգամ աշխատելու և լիճը մաքրելու:
Թռչունները խղճացին նրան: Ու այդ օրից սկսած` կկուն առաջինն է մաքրում ջրամբարներն ու լճերը:
Նիկոլյան Ռուզան, քոլեջ
Ղեկավար` Գ. Փարվանյան