Մայիսի 28-ի առավոտյան կրթահամալիրի փոքր խմբով վեր կացանք և ուղևորվեցինք դեպի Ծաղկունք: Ճանապարհին Տիար Բլեյանը իր հետաքրքիր և զվարճալի պատմություններով ավելի բարձրացրեց մեր տրամադրությունը: Երբ տեսանք շատ ծաղիկներ և զգացինք, որ օդը փոխվել է, հասկացանք, որ հասել ենք Ծաղկունք:
Հասնելուն պես բարձրացանք գյուղի նորակառույց Սուրբ Սարգիս եկեղեցի, որտեղ մատուցվեց պատարագ: Պատարագի ժամանակ Բլեյան Շուշանը կատարեց հոգևորական երգեր, ու բոլոր ներկաներով շնորհավորեցինք հանրապետության անկախության տոնը:
Հետո արդեն մեզ ծանոթ մարդկանց հետ ուղևորվեցինք դեպի գյուղի` 1941- 1945 թթ. Մեծ հայրենականում զոհված ծաղկունքցիների հիշատակի հուշահամալիր, որտեղ գյուղի դպրոցականները իրենց խոսքով հանդես եկան և ողջունեցին հուշարձանի շուրջը հավաքվածներին:
Այս ամենից հետո, մի փոքր հոգնած, բայց լավ տրամադրությամբ գնացինք դեպի Ծաղկունքի նոր վերանորոգված դպրոց: Դպրոցը վերանորոգվել էր համայնքի բարերարներ Աղաջանյան եղբայրների օգնությամբ, ովքեր ներկա էին տոնախմբությանը: Չնայած` գյուղը այդքան մոտ է Սևանա լճին, չունի ջրամատակարարում, և Աղաջանյան եղբայրների հիմնած «Դար» հիմնադրամը մոտ ապագայում համայնքի այս խնդիրը ևս կլուծի:
Դպրոցի բակում մեզ սպասվում էր դպրոցականների պատրաստած աշխատանքների ցուցադրություն, սպորտային վարժությունների դիտում և ֆուտբոլային խաղ: Այս ամենն ուղեկցվում էր երգ ու պարով, իսկ մենք կրթահամալիրցիներով մեծ աշխուժություն էինք ցուցաբերում: Ծաղկունքցիներին իր խոսքով ողջունեց տիար Բլեյանը: Նա կարևորեց նոր համայնքի ստեղծումը, «Դար» հիմնադարամի կրթական, սոցիալական ծրագրերի ուղղվածությունը նոր` հայրենատիրոջ, գյուղատիրոջ կրթությանը և կրթահամալիրի կողմից ամեն կերպ օգնելու, աջակցելու պատրաստակամություն հայտնեց: Ծաղկունքի ավանդական գաթայի հյուրասիրությամբ տոնախմբությունը դպրոցի բակում ավարտվեց:
Ծաղկունքում մեզ շատ լավ ընդունեցին: Տոնական օրը ավելի հետաքրքիր դարձավ, քանի որ մենք հյուր գնացինք Աղաջանյան եղբայրներին: Մեզ նրանց տանը սպասվում էր հյուրասիրություն, որից հետո` երաժշտական հետաքրքիր կատարումներ: Բոլորս տպավորված էինք Շուշան Բլեյանի և Արթուր Շահնազարյանի կատարումներից: Մեր կրթահամալիրի մասին շատերին ծանոթացնելուց, ուրախ և ընկերական հանդիպումից հետո, լավ տրամադրությամբ վերադարձանք Երևան:
Սպասենք դեպի Ծաղկունք մեր հաջորդ ուղևորությանը, որը շուտով կկայանա:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
