Այսօր Դիջանում մեկնարկեց «Հայաստան 20.18-2018թ.՝ Հայաստանը 20 ամենանորարար երկրների շարքում» խորագրով Բիզնես ինովացիոն երկօրյա ֆորումը: Ֆորումին մասնակցում էին հայաստանյան և արտերկրյա տեխնոլոգիական, կրթական և ինովացիոն այլ ոլորտների մասնակիցներ, ՀՀ կառավարության ներկայացուցիչներ:
Այսօրվա օրակարգի ուղղություններն էին ինովացիոն էկոհամակարգերը, ինովացիան և կրթությունը: Ֆորումի հիմնական խոսնակը Իսրայելի Թել Ավիվի համալսարանի StartTau Ձեռներեցության կենտրոնի գործադիր տնօրեն Ելենա Դոնեթսն էր: Նա կորպորատիվ ընկերություններին խորհրդատվություն է տրամադրում ինովացիոն կենտրոնների ստեղծման և աքսելերացիոն ծրագրերի ներդրման վերաբերյալ: Տիկին Դոնեթսը ներկայացրեց իսրայելական նորարարությունները, կիսվեց իր փորձով և խորհուրդ տվեց չվախենալ ձախողումից, որովհետև ձախողումներն են, որ ավելի մեծ հաջողություն են բերում:
Երկրորդ նստաշրջանում նախատեսվում էր, որ զեկույցով հանդես կգա ՀՀ գիտության և կրթության նախարար Արմեն Աշոտյանը, սակայն ինչպես նախորդ տարի, այս տարի էլ պարոն նախարարը խիստ զբաղվածության պատճառով ներկա չէր ֆորումին, և կրթությունը նորարարցնելու հետ կապված հարցերը, մտահոգությունները ներկաները ստիպված էին առանց պատասխաններ ստանալու ուղղակի բարձրաձայնել:
Հայաստանն այսօր ոչ գոհացուցիչ հորիզոնականում է գտնվում նորարար երկրների շարքում, և ֆորումի հիմնական նպատակն է երկու օրվա ընթացքում քննարկել բոլոր մարտահրավերները, լսել տեղական և միջազգային հաջողված նախաձեռնությունների մասին, կազմել գործողությունների պլան 2018թ-ին նորարար երկրների քսանյակում ընդգրկվելու համար:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
