«Մխիթար Սեբաստացի» կրթահամալիրի և «Քվանտ» վարժարանի «Տիեզերք» ակումբները Կրթության և գիտության նախարարության տեխնիկական ստեղծագործության հանրապետական կենտրոնի նախաձեռնությամբ հունիսի 9-ից 10-ը Բյուրականի աստղադիտարանում կազմակերպել էին տիեզերքով հրապուրված 12 -15 տարեկան դպրոցական տիեզերագետների աշխատանքների ամփոփում և բաց պարապմունքներ: Կազմակերպիչները հոգացել էին, որ մասնակիցները հարմար տեղավորվեն հյուրընկալ Բյուրականի աստղադիտարանի հյուրատանը, հնարավորինս շատ տեղեկություններ ստանան, ժամանակը հագեցած և հետաքրքիր անցկացնեն: Կարևորվել էին նաև հասակակիցների անձնական շփումները, համագործակցությունը:
Կատարվել են դիտումներ ինչպես աստղադիտարանի դիտակով, այնպես էլ «Մխիթար Սեբաստացի» կրթահամալիրի «Տիեզերք» ակումբի նոր աստղադիտակով: Աստղադիտակը ակումբին նվիրել է «Հեռանկար» կրթական ծրագրը: Այս աստղադիտակով մասնակիցները դիտեցին Սատուրնի օղակները, կրկնակի աստղերը, աստղակույտերը, Լուսինը: Պատանի աստղագետները այցելեցին Վիկտոր Համբարձումյանի տուն-թանգարան, եղան նաև նրա գրադարանում և աշխատասենյակում, որտեղ կինոլեկտորիում անցկացվեց:
Նշենք նաև, որ կրթահամալիր «Տիեզերք» ակումբն իր նոր դիտակով հունիսի 6-ին մասնակցել է Կասկադի վերին հարթակում կազմակերպված Վեներայի անցումը Արեգակի սկավառակի վրայով դիտելու նախաձեռնությանը և արժանացել ներկաների հիացմունքին, ցուցադրելով այդ հազվադեպ երևույթը տեսանելի 6 գույներում:
«Տիեզերք» ակումբ
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
