Արարատյան Հայրապետական թեմի անունից բերում ենք Ձեզ մեր օրհնություններն ու սրտաբուխ շնորհավորանքները` Գիտելիքի օրվա` սեպտեմբերի 1-ի առիթով:
Սիրելի՛ հրաշամանուկներ, Ձեր առջև բացվում է նոր, լուսառատ մի ճանապարհ, որտեղ Մաշտոցյան գիրն ու այբուբենը ուսումնական հունձքի հրավեր է ձեզ:
Առաջին զանգ, առաջին քայլ, առաջին թրթիռ և հուզում…
Թո՛ղ բարու, արդարության, ճշմարտության հաղթանակի իդեալներով միահյուսված լինեն ուսման Ձեր երազանքները:
Սիրելի՛ երիտասարդներ և երիտասարդուհիներ, հավատքով և նվիրումով գոտեպնդված` նոր ոգով և տեսիլքով շարունակե՛ք լիացնել ձեր վարդագույն տարիները` որպես մտածող, խորհող, ապագայի անձեր: Թող նոր ուսումնական տարին որակապես և իմացականորեն ավելիին բարձրանալու մղումներ հաղորդի Ձեզ:
Սիրելի՛ ուսուցիչներ և դասախոսներ, կրթական և դաստիարակչական մեծ առաքելության շաղախով` շարունակեք Ձեր ավանդը ներդնել հայակերտման և մարդակերտման գանձանակի մեջ` հավատարմություն ցուցաբերելով ազգային և քրիստոնեական արժեքներին, Հայոց լուսարձակի տակ պահելով 21-րդ դարի շունչն ու ռիթմը:
Մեր աղոթքներն ենք հղում առ Բարձրյալն Աստված, որպեսզի Երկնային Տերն իր Սուրբ Աջով հովանի լինի Ձեզ և բարեզարդի Ձեր կյանքն ու ուսյալ սրտերը:
Սիրով և օրհնությամբ` Տ. ՆԱՎԱՍԱՐԴ ԱՐՔԵՊԻՍԿՈՊՈՍ ԿՃՈՅԱՆ