77 տարեկան հասակում վախճանվել է գրող, երգիծաբան Արամայիս Սահակյանը: Նա մահացել է արյան հիվանդությունից՝ մի քանի օր հիվանդանոցում անցկացնելուց հետո:
Արամայիս Սահակյանը ծնվել է 1936 թ. մայիսի 24-ին, Արծվաշեն գյուղում: Ավարտել է Խաչատուր Աբովյանի անվան պետական մանկավարժական ինստիտուտի պատմալեզվական ֆակուլտետը։ Աշխատել է «Ավանգարդ» թերթում, «Գարուն» գրական ամսագրում ՀԼԿԵՄ Կենտկոմում, ՀԽՍՀ հեռուստատեսության և ռադիոհաղորդումների պետական կոմիտեում։ 1982-ից «Ոզնի» երգիծական հանդեսի գլխավոր խմբագիրն է։ Նրա բանաստեղծությունները պարբերաբար տպագրվել են հայկական ու համամիութենական մամուլում: Նա բազմաթիվ երգերի տեքստերի հեղինակ է, նրա աշխատանքները թարգմանվել են աշխարհի 30-ից ավելի լեզուներով:
Նա մի շարք գրքերի հեղինակ է, որոնցից են «Սիրո հասակ», «Մենք միասին ենք», «Աստղիկներ», «Ապրել եւ սիրել», «Երջանիկ եղեք», «Ես սիրում եմ ձեզ» եւ այլն:
Արամայիս Սահակյանը լայն հանրությանը հայտնի է իր խմբագրած «Ոզնի» երգիծական շաբաթաթերթով, որը շարունակել է հրատարակել նաեւ ԽՍՀՄ փլուզումից հետո: Նա նաեւ աշխատել է Հանրային հեռուստաընկերությունում։ Ընտրվել է նաեւ Հայաստանի ԱԺ պատգամավոր։