Մենք ուխտ ունենք միշտ դեպի լույս… Թումանյանական բառերով ուխտի ելած մեր հայորդիներին, մաղթում եմ իղձերի ու փափագների լույս իրականացում: Ինքնանպատակ չէ այս ուխտագնացությունը. մեր երիտասարդ մատաղ սերունդներին հաղորդակից դարձնել մեր սրբություններին, կրթել նրանց ազգային վեհ ու կենսական արժեքներով ու գաղափարներով:
Արագածոտնի մարզում, Օշականում է գտնվում հայոց սրբավայրերից Սուրբ Մեսրոպ Մաշտոց եկեղեցին, որտեղ գտնվում է Սուրբ վարդապետի, ուսուցչապետի գերեզմանը: Կորյունը գրում է, որ սրբի մահից երեք տարի անց Վահան Ամատունին Մաշտոցի գերեզմանի վրա ձեռնարկում է եկեղեցու կառուցում, որտեղ հետագայում` 1875-1879 թթ. Գևորգ Դ Կոստանդնուպոլսեցի կաթողիկոսի կողմից կառուցվել է ներկայիս եկեղեցին, որի արևելյան կողմում զանգակատունն է, իսկ խորանի տակ Սուրբ Մեսրոպի դամբարանը: Օշականում է գտնվում նաև Արագածոտնի թեմի առաջնորդարանն ու <<Մեսրոպ Մաշտոց>> դպրատունը: Արագածոտնի թեմում են նաև միջնադարյան Հայաստանի նշանավոր մի շարք վանքեր ու եկեղեցիներ` Հովհաննավանքը, Տեղերի, Մուղնու, Ուշիի վանքերը, Սաղմոսավանքը: