Օ՜, ո՛չ դու չե՛ս լսել երբեք տրտունջը իմ
Ո՛չ հոգնության, ո՛չ չար հերյուրանքի հանդեպ,
Թեկուզ իջել են ծանր, օրհասական ամպեր,
Իմ ուսերին խոնջած և անտերունչ շնչին...
Ինձ չի՛ ընկճել երբեք և ո՛չ մի ծանր քար,
Եւ ո՛չ մի սև կոշկոճ` ընկած խոփիս առջև,
Ես չեմ շեղվել երբեք, երբեք ետ չեմ դարձել`
Ակոսներից երկար, և՛ քարքարոտ և՛ դար:
Ես չեմ շեղել երբեք հերկն հայրենի խոհի,
Եւ հանդուրժել, որ բյուր սերունդների հերկած
Հին գրքերում մնա անգամ չնչին մի քար`
Նետված օտար ձեռքով, որ խարանե ուղին...
Ե՛վ մառախուղ և՛ մեգ, և կողմերից օտար,
հռնդալով թռչող ոչ ընչաշունչ քամի,
Ե՛ւ վայրենի վրեժ դժնի բարեկամի,
Ե՛վ ոսոխի ժանիք արյունոտած:
Հեղեղատներ` հանկարծ, հայրենական հողի,
Անդաստաններն համայն հեղեղատող,
Չեն ընդհատել երբեք այս տքնությունն անդուլ,
Հազարամյա արյամբ սրբագործված խոհի...