Կիրակի օրը ժամը 13-ին տիար Բլեյանի և Վահրամ Թոքմաջյանի ղեկավարությամբ ուղևորվեցինք Հայաստանի հանրային հեռուստաընկերություն` «Հայոց հարց» հաղորդման նկարահանմանը ներկա գտնվելու: Մասնակիցները ավագ դպրոց վարժարանի 10-րդ դասարանի աշակերտներն էին, իսկ հաղորդման թեման` Գրիգոր Արծրունին: Հաղորդումը վարում էր Արթուր Բախտամյանը: Բուռն քննարկում էր սկսվել հաղորդման հյուրերի միջև, որի արդյունքում բերվեցին կարևոր փաստեր, խոսվեց հայ հրապարակախոս-քննադատի կարևոր ու արդյունավետ գործունեության մասին: Հաղորդման վերջում վահանակների միջոցով կատարվեց քվեարկություն: Ներկա գտնվողների 80 %-ը կողմ էր քվեարկել նրա վարած գործունեությանը, իսկ մնացածը` դեմ:
Այժմ մի փոքրիկ մեջբերում Գրիգոր Արծրունու կյանքից:
Պատմում էին, թե Գրիգոր Արծրունու ծննդյան օրը, հայրը, որ պաշտոնաթող գեներալ էր, նայելով նրա երեսին, ասել է.
— Օ՛ դու ինձ համար փորձանք ես դառնալու:
Իրողություն է այս, թե անեկտոդ` չգիտեմ, բայց մի անգամ Արծրունին իր հոր գլխին մի փորձանք բերեց: Թիֆլիսի քաղաքային ինքնավարության ընտրություններն են: Իրավասուների մի խումբ քաղաքագլխի պաշտոնի համար թեկնածու է հայտարարել Արծրունու հորը, ի նկատի ունենալով ոչ այնքան նրա արժանավորությունները, որքան նրա գեներալային տիտղոսն ու հարստությունը: Մի ուրիշ խումբ որոշել է ընտրել վրացի Կիպիանուն, որ իրոք մի արժանավոր անձնավորություն էր և որ ապագայում շատ հալածանքներ կրեց ցարական կառավարությունից և մեռավ աքսորավայրում: Այս վերջին խմբի մեջ է լինում և Գրիգորը: Նա ասում է.
— Հայր, եթե դու քվեարկվես, գիտցիր, որ ես քեզ սև քվե եմ տալու:
— Չես համարձակվիլ, թշվառական, — գոռում է գեներալը, որ վերին աստիճանի մի կամակոր և անզուսպ մարդ է եղել:
Գրիգոր Արծրունին կատարում է իր սպառնալիքը: Ընտրությունների ժամանակ նա իր ճերմակ քվեն գցում է Կիպիանու տուփի, իսկ սև քվեն` իր հոր տուփի մեջ: Եվ այդ մի հատիկ քվեով Կիպիանին քաղաքագլուխ է ընտրվում:
Գայանե Ղարախանյան, Աիդա Գրիգորյան, 10-3 դաս.