Շատ եմ սիրում մասնակցել օլիմպիադաներին: Սակայն այս օլիմպիադան յուրահատուկ է, քանզի իր կառուցվածքով տարբերվում է մյուսներից:
Օլիմպիադայի առաջադրանքները պետք է կատարենք 1 շաբաթվա ընթացքում մեր իսկ համակարգիչներով: Մեզ կարող են օգնել ծնողները, գրքերը և այլն: Օլիմպիադային կարող են մասնակցել բոլոր երեխաները, կարող են մասնակցել նաև Հայաստանից դուրս գտնվողները:
Ես ինքս փորձում եմ օլիմպիադայի բոլոր առարկաներին մասնակցել և կարծես ամեն ինչ լավ է ընթանում: Քանի որ գրեթե բոլոր առաջադրանքները ստեղծագործական են և հենց քո աշխատանքն են պահանջում, այդ պատճառով էլ ծնողներիս օգնության կարիքը չեմ զգացել: Առաջադրանքներից յուրաքանչյուրը յուրովի է հետաքրքիր: Ես էլ հաճույքով կատարում եմ առաջադրանքները:
Ամիրխանյան Քրիստինե, 9-րդ դաս.
Ես հարցազրույցների ընթացքում իմացա, որ մասնակիցները օլիմպիադային մոտենում են շատ լուրջ և մեծ մասի նպատակն է հաղթել, ձեռք բերել ուսումնական ճամփորդության ուղեգիր,նոր տեղեկություններ ստանալ սեփական հետազորությունների շնորհիվ: Շատերն էլ ասում են, որ առաջադրանքները կատարելու համար պետք է աշխատասիրություն:
Մկրտչյան Էլեն, 9-2 դաս.
Սկսվել է գարնանային օլիմպիադան: Այն անսովոր աշխուժություն է առաջացրել: Ինձ հետաքրքիր էին ընկերներիս, համադպրոցականներիս կարծիքները: Այդ նպատակով էլ հարցազրույց անցկացրեցի: Կարծիքները, ինչպես և սպասում էի, տարաբնույթ էին: Սակայն հատկանշական է, որ օլիմպիադայի առաջադրանքները հիմնականում դրական արձագանք են ստացել: Շատերը հետաքրքրությամբ հետևում են օլիմպիադայի ընթացքին, ակտիվորեն մասնակցում են, միմյանց հետ բանավիճում: Սովորողների մի մասն ուզում է օլիմպիադայի առաջադրանքները ուսուցիչների հսկողությամբ կատարել և նրանց առջև ցուցադրել իրենց գիտելիքները: Առավել փոքրաթիվ են այն աշակերտները, ովքեր ավելորդ են համարում գարնանային օլիմպիադայի անցկացումը: Կարծում եմ, որ այս օլիմպիադան, ինչպես գարնանային զարթոնքը, սթափեցնում է մեզ, ստիպում վերանայել մեր դիրքորոշումները, մղում առաջադիմության, աշխատասիրության:
Սիմոնյան Լարիսա, 9-րդ դաս.
Ծաղկաքաղը` Մարգարիտ Սարգսյանի