Մայր դպրոց-Գեղարվեստ ճանապարհն այն~քան լավն է, հարմար. առանց տրանսպորտի 5 րոպեի ընթացքում մեզ հնարավորություն է տալիս հասնել կրթահամալիրի մի օղակից մյուսը:
Մայր դպրոց-Գեղարվեստ ճանապարհն այն~քան… վատն է. կրկին անմխիթար վիճակում գտնվող աստիճաններ, աղբի «տեսականի»` փնթի, տգեղ, տհաճ: Վտանգավոր դրություն. ցավոք, ափսոս, ամոթ…
Ամեն օր վերուվար ենք անում, ամեն օր ափսոսանք էինք ապրում, բայց չհասցրինք ինքներս ոտքի կանգնել, տիարը մեզ հուշեց…
Նախօրոք պլանավորել էինք, պատրաստվել /պարկեր, տոպրակներ/, ժամադրվել /տասներորդցիների, տասնմեկերորդցիների, ընկեր Գրիգորի հետ/, բայց… եղանակը միջամտեց…
Հետո, ապրի անձրևը, դադարեց մինչև մեր պայմանավորվածության ժամը, գործի անցանք: Սարսափելի բարկացանք, բողոքեցինք, տրտնջացինք, զզվեցինք, զարմացանք ու… մաքրեցինք:
Ընթացքում անցորդներից շատերը կանգ առան, մեր ձեռնարկած քայլը խրախուսեցին: Մի տատիկ էլ, թոռնիկի ձեռքը բռնած, խնդրեց աստիճանները վերանորոգելու ծրագիր ձեռնարկել` մեզ, ասես, շատ կարող ուժ համարելով: Պատմեցինք, որ այդ հարցն ինքներս էլ կարևորում ենք և խնդրանքով դիմել ենք քաղաքապետին, սպասում ենք պատասխանի: Ի դեպ, ստացել ենք ծանուցում, որի համաձայն մեր դիմումը գրանցվել է Երևանի քաղաքապետի գրասենյակում հունվարի 21-ին: Խոստացել են 30 օրվա ընթացքում տալ պատասխան: Այսինքն` ժամանակն անցել է: Մենք երկուշաբթի օրը կհիշեցնենք մեր գոյությունը:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
