Տյառնընդառաջ
Առավոտյան 5տարեկան Բադալյան Մարիամը ուրախ մտավ խմբասենյակ, բարևեց և ասաց.
-Ընկե’ր Աննա,<Տրնդեզի>. թուղթը բերել եմ:Ես եմ չէ, հարսիկը լինելու:Գիշերը ես գնացի քնելու,տատիկս և մայրիկս գրում էին:
Ահա թե ինչ էր գրված <Տերնդեզի թղթում>:
Տրնդեզով վերջանում է ձմռան քառասունքը:
<<Մեծ գոլն ընկավ>>, այսինքն`ցանքերն սկսվեցին: (Շիրակ)
Տրնդեզի կրակը վռնդում է աղքատությունը: (Զանգեզուր)
Տրնդեզի կրակը իր հետ բերում է օդի բարեխառնություն, հունձքի առատություն արտերի բերրիություն, ամուսինների օրհնություն: (Ղարաբաղ, Զանգակ):
Տրնդեզի խարույկի վրա փայտ են ավելացնում`<<Ձմեռը վառել>>կոչով:
Տրնդեզ`դարման ու կես, առնեմ չվան` ելնիմ ի դեզ: (Մուշ)
Հարսին բերեք` կրակին ցույց տանք:
Հարսին բերեք` կրակ տեսնի:
Թռչենք կրակի վրայից, տունն ազատենք չարքերից:
Տերնտես, երեխայի քառասունքը լցվեր :(Ջավախք)
Հավերնիս ածան ըլլա, կովերնիա կաթուն ըլլա, հարսներիս ծնան ըլլա:
Տերնտաս, Տերնտաս, տերտերին աղջիկն ինձի տաս:
Տերընդեզ, քուրդ ինձի տաս, ես պագնեմ, դուն դուրանաս:
Տրնդեզին ծնված երեխան կրակի հետ է ծնվել` չար ու կրակոտ կլինի:
Տրնդեզին ծնված տղան <<լուս պարոն է >>, աղջիկը`<<լուս խաթուն>>:
Տրնդեզ, փեսին կապանքից ազատես:
Տրնդեզ`դարման ու կես
Առ հաց ու կես`ելիր գեղես:
Տերընդեզ`մխի դին տես,
Մե փութ ցանես`հարյուր քաղես:
Տերնդեզ`դարման ու կես,
Առնիմ մանգաղ`ելնիմ խոտի դեզ:
Անցյալ տարվա Տրնդեզ, դու բերես իմ առաջ
Տրնդեզ` աղանձ անես, մեր սարերի պես զարդարես:
Տրնդեզ`աղանձ անես,<<Սիս ու Մասիս>> զարդարես:
Տրնդեզ` մոխիր տանես, արտ ու արոտ առատ անես:
Տրնդեզ` մոխիր ցանես, մոխիր ցանես`հաց հավաքես:
Տրնդեզ` հալվա անես, բաժանես:
Շնորհակալություն Բադալյան Մարիամի տատիկին, բանահավք`Հրանուշ Խառատյանին և մայրիկին`Լուսինեին:
Նոր դպրոցի նախակրթարան Դաստիարակ`Աննա Հայրոյան