Իմ անունը Վարդուհի է: Ես ավարտել եմ Երևանի պետական համալսարանի Սոցիոլոգիայի ֆակուլտետի «Սոցիալական աշխատանք» բաժինը: Պաշտպանել եմ «Ներառական կրթության իրականացման գործընթացը ՀՀ-ի հանրակրթական դպրոցներում» թեմայով դիպլոմային աշխատանքը: Երբ ես սովորում էի առաջին կուրսում, իմ պատկերացումը այս մասնագիտության մասին բոլորովին այլ էր, սակայն ուսումնասիրելով` ես հասկացա, որ այն ավելի շատ մարդասիրական է և այդ մասնագիտությամբ աշխատելու համար անհրաժեշտ են այնպիսի հատկանիշներ, ինչպիսիք են ապրումակցումը, հարգանքը մարդու առանձնահատկության նկատմամբ, անմիջականությունն ու վստահություն ձեռք բերելու կարողությունը, մի խոսքով` աշխարհայացք, որի հիմքում ընկած է մարդուն օգնության ձեռք մեկնելու նաև մասնագիտական կարողությունը: Սոցիալական աշխատանք մասնագիտությունը օգնող մասնագիտություն է: Այն ենթադրում է հատուկ կարիք ունեցող (իսկ հատուկ վերաբերմունքի և մոտեցման կարիք շատերս ունենք) մարդկանց ներառումը հասարակություն, որևէ ծրագիր կամ խումբ: Իսկ հատուկ կարիք ունեն և´ առողջական, հոգեբանական, մտավոր խնդիրներ ունեցողները, և´ օժտվածության առանձնահատկություն ունեցողները, ծնողներ և ուսուցիչներ, որոնք ակտիվ ներառված չեն իրենց առջև դրված խնդրի լուծման գործում, սոցիալապես անապահով մարդիկ, սոցիալական նոր միջավայրում հայտնվածները և այլն: Ես սիրում և կարևորում եմ իմ մասնագիտությունը և ուզում եմ հավատալ, որ կկարողանամ իմ ստացած մասնագիտական գիտելիքները, անընդհատ զարգացնելով և խորացնելով, կիրառել կյանքում:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
