Դեռ չքնաղ Ծաղկունքից նոր վերադարձած` ճանապարհ ընկա էլ ավելի չքնաղ Ծաղկաձոր:
Այս անգամ այստեղ, «Կեչառիս» հյուրանոցում, հունիսի 6-ին և 7-ին տեղի ունեցավ «Արհմիությունների կարողությունների զարգացում» Արհմիութենական գործունեության հիմունքների ուսուցման սեմինար:
Մասնակիցները կրթության ոլորտի արհմիութենական կազմակերպությունների ղեկավարներն էին:
Միջազգային սեմինարը վարում էին Անգլիայից ժամանած Ալեքսանդրա Ռյուդինգը և Բարրի Ֆոսեթը` «Կրթության ինտերնացիոնալ»-ից:
«Կրթության ինտերնացիոնալ»-ը համաշխարհային արհմիութենական դաշնություն է: Այն միավորում է կրթության բնագավառի 30 միլիոն աշխատողների, ներկայացնում է իր անդամների շահերը 400 կազմակերպություններում` 170 երկրներում:
Այն աշխարհում խոշորագույն ոլորտային արհմիութենական դաշնությունն է:
Մեր կրթահամալիրի արհեստակցական կազմակերությունը այդ դաշնության
անդամ է:
Սեմինարի ժամանակ քննարկվեցին արհմիութենական իրավունքները և աշխատանքի միջազգային չափորոշիչները և էլի շատ հարցեր:
Ինչպես ասում են` սեմինարը անցավ բարձր մակարդակով և կլինի պարբերական:
Բարրի Ֆոսեթը անցյալ տարի սպորտի և տուրիզմի աշխատողների ճյուղային արհմիության նախագահի` Կառլեն Հարությունյանի հետ այցելել էր մեր կրթահամալիր:
Զրույցի ժամանակ նա ասաց, որ լավագույն տպավորություններով է գնացել մեր կրթահամալիրից և, որ անգամ Անգլիայում այսպիսի կրթական օջախ չկա: Կրկին շնորհակալություն հայտնեց կրթահամալիրում ստացած հուշանվերի համար: Ափսոսեց, որ այս անգամ չի կարող այցելել մեզ, քանի որ սեմինարից անմիջապես հետո մեկնեց օդանավակայան:
Բարրի Ֆոսեթի տպավորությամբ` մեր կրթահամալիրում և սովորողները, և դասավանդողները շատ խելացի ու բարեհամբույր են:
Նա խնդրեց, որ ես այս ամենը անպայման ասեմ տիար Բլեյանին, ողջունեմ ուսուցիչներին և սովորողներին, ինչը և սիրով անում եմ: