Զարուհի Առաքելյան
Մաքուր օդ, հաճելի ճանապարհ, կանաչ տարածքներ և գեղեցիկ տեսարաններ: Վայելելով այս ամենը հասանք Ծաղկունք գյուղի Հովհ. Թումանյանի անվան միջնակարգ դպրոց: Հեռուստառադիոպետկոմի նախկին նախագահ Հակոբյան Տիգրանից հրավեր էինք ստացել շրջելու դպրոցով: Տիար Բլեյանի և Թոփչյան Արմինեի հետ մի լավ ուսումնասիրելով դպրոցը հայտնեցինք մեր կարծիքը, համեմատեցինք կրթահամալիրի հետ: Տասներորդ դասարանցիների կենսաբանության դասաժամին փոքրիկ հարց-պատասխան եղավ տիար Բլեյանի և սովորողների միջև: Քննարկվեցին շրջակա միջավայրի խնդիրները:
Որպես գրադարանի աշխատող ծանոթացա նրանց գրադարանին, կարճ ժամանակում ներկայացրի մեր գրադարանն ու աշխատանքը, որից հետո մի քանի ուսուցիչների ներկայացրի կրթահամալիրը: Մեր գրադարանը պահանջվող գրականության ցանկը ստանալուց հետո նվիրատվություն կկատարի, քանի որ տեղեկացա, որ նրանք ունեն 2000 կտոր գիրք, իսկ հայ դասական բանաստեղծների գրքերի պահանջարկը մեծ է: Ընկեր Արմինեն պահը բաց չէր թողնում և անընդհատ լուսանկարում էր:
Մի լավ շրջելուց հետո հավաքվեցինք դպրոցի ուսուցչանոցում և տիարը ներկայացրեց կրթահամալիրը: Հնչեցին մի շարք առաջարկներ` համագործակցությունն ամրապնդելու համար: Իսկ կրթահամալիրին ավելի լավ ճանաչելու համար նրանց հրավիրեցինք մեզ հյուր, մենք նույնպես հրավեր ստացանք ամռանը հաճելի ժամանակ անցկացնելու Ծաղկունք գյուղում: Գրադարանին նվիրելով կրթահամալիրի հրատարակած գրքերի փաթեթը հրաժեշտ տվեցինք նրանց:
Հյուրընկալությունն ու դպրոցը շատ լավն էին, միայն անհանգստացանք նրանց համակարգիչներով, որոնք փակի տակ էին, քանի որ գողության վախ կար: Հուսով ենք մեր առաջարկները չեն անտեսվի:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
