Օգոստոսի 28-ին միջին դպրոցի սեմինարի թեման ներառական ուսուցման կազմակերպումն էր: Սեմինարը վարում էր Շվեդիայում հատուկ պայմանների կարիք ունեցող երեխաների հետ աշխատող, բուժթերապևտ Ռուզան Պողոսյանը: Նա ներկայացրեց աշխատանքի իր փորձն ու կազմակերպման ձևերը: Բայց հիմնական քննարկումն ընթացավ հատուկ պայմանների կարիք ունեցող (հատկապես` աուտիզմով երեխաների, որոնք այսօր ամենաանծանոթն են մեզ) երեխաների հետ աշխատելու, հաղորդակցվելու անհրաժեշտ պայմանների շուրջ: Մանրամասն ներկայացրեց այսպիսի երեխաների հնարավոր զգացողությունները, ընկալումները, դրսևորումները, ինչպիսի մոտեցում, միջավայր, գործիքներ են անհրաժեշտ նրանց հետ աշխատանքում հաջողություն ունենալու համար: Մեր հնարավոր ջանքերը ինչ ուղղությամբ պետք է ընթանան, ճիշտ ու համակողմանի աշխատանքի դեպքում ներառման ինչ աստիճան կարող ենք ակնկալել: Դասավանդողներին հետաքրքրող հարցերը շատ էին ու կոնկրետ, դրանց բոլորին տրվեցին սպառիչ պատասխաններ: Շնորհակալություն օգտակար սեմինարի համար:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
