Ի՞նչն էր հայցի նպատակը:
Խաղարկային դատի միջոցով ցույց տալ ինչպիսին կարող է լինել հավասարությունը, ինչպիսին կարող է լինել հանդուրժողականությունը այլախոհների հանդեպ, ինչպիսի ուժ ու անկողմնակալություն կարող է ունենալ սահմանադրությունն ու մարդու իրավունքների կոնվենցիան:
Ինչի՞ հասցրեց հայցը:
Կրոնական հողի վրա տարբեր մակարդակի քննարկումների, սահմանադրության և օրենքների մեկնաբանման:
Ինչպե՞ս եմ տեսնում լուծումը:
Սեփական օրինակով ցույց տալը այն ամենը, ինչի մասին խոսվում էր:
Ես, դադարեցնելու համար բանավեճերը, որոնցում հաճախ նաև անհանդուրժողականություն կար, լինելով առողջ բանավեճի կողմնակից, կարևորելով լուսավորը, սերը, հաշտությունն ու պինդ միասնությունը, կարևորելով կյանքն ու արարչությունը, գարունն ու ստեղծումը անկախ կրոնական նախապատվություններից ՝ դիմում եմ դատարանին՝ դադարել ինձ հայցվոր կողմ ճանաչել՝ պատրաստ լինելով հանդես գալ որպես երրորդ կողմ:
Հույս ունեմ, որ շատերը հասկացան, թե ինչ վերաբերմունք ունեմ իմ արդեն քսանյոթամյա կրթօջախին ու ինչ պահանջներ: Չեմ ուզում նաև, որ կրթահամալիրի որևէ ներքին պարզաբանում ու խնդիր լուծվի այլոց (դրսի) միջամտությամբ: Դադարեցնում եմ մի գործընթաց, որն աննպատակ չէր, որն ունեցավ տարաբնույթ և հակասական մեկնաբանություններ, և որի շարունակումն անիմաստ եմ համարում:
Եվ վերջում պարզապես՝ մի կարծեք, թե ոչ քրիստոնյաներն անհավատներն են ու անաստվածները: Ես, չլինելով աթեիստ, բազմաթիվ աթեիստների մեջ տեսել եմ ամենակարևոր հավատը, հավատը մարդու նկատմամբ՝ Արարչության տանող ամենակարևոր հավատը, որի դեմ անզոր է ցանկացած կրոն: Քրիստոնյա լինելուց առաջ հանդուրժող եղեք, արարող, ու որ ամենակարևորն է՝ զերծ մնացեք կրոնական զայրույթից: Մարդը ծնվում է ազատ, մարդն ինքն է ճանաչում իր աստծուն, մարդն ինքն է փնտրում արարչության աղբյուրը:
Մենք ազատության, այլախոհության ու գարունի ավելի կարևոր ու միասնական պայքար ունենք: