Այսօր՝ ժամը 14:00-ից մինչև 16:00-ն, «Անի» հյուրանոցի «Գառնի» սրահում տեղի ունեցավ կլոր սեղան-քննարկում «Cambridge University Press»-ի ներկայացուցիչների հետ, որին մասնակցում էին հայաստանյան տարբեր ուսումնական կենտրոնների, այդ թվում՝ Երևանի պետական համալսարանի, Հայ-ռուսական (Սլավոնական) համալսարանի, Հայկական պետական մանկավարժական համալսարանի, ինչպես նաև՝ մի շարք հրատարակչությունների և գրախանութների ներկայացուցիչներ: Վերոնշյալ քննարկմանը մասնակցում էր նաև Մխիթար Սեբաստացի կրթահամալիրի ներկայացուցիչը:
Ողջույնի խոսքով հանդես եկան ՀՀ-ում «Cambridge University Press»-ի մտավոր սեփականության իրավունքների և օրինական շահերի ներկայացուցիչ Նարինե Մկտրչյանը և ՀՀ-ում «Cambridge University Press»-ի բացառիկ դիստրիբյուտոր «Մանմար» ՓԲԸ-ի ներկայացուցիչ Միհրան Բարսեղյանը: Ելույթ ունեցավ Թվինինգ ծրագրի համակարգող, փորձագետ Յանե Վելենդորֆը, ով խոսեց Թվինինգ ծրագրի շրջանակներում մտավոր սեփականության իրավունքի խնդիրների, կատարված և սպասվելիք փոփոխությունների մասին: Ելույթ ունեցան նաև Մտավոր սեփականության գործակալության, ՀՀ ՊԵԿ մաքսային ծառայության ներկայացուցիչները:
Տեղի ունեցավ բուռն քննարկում, մտքերի փոխանակում: Կլոր սեղանի մասնակիցները տեղեկացան, որ նման քննարկումները պարբերական բնույթ են կրելու, որոնց ժամանակ հնարավոր կլինի համագործակցություն հաստատել «Cambridge University Press»-ի և հայաստանյան տարբեր ուսումնական հաստատությունների միջև:
Ինքս պատրաստ եմ հետագայում նույնպես մասնակցել «Cambridge University Press»-ի կողմից կազմակերպված քննարկումներին, և, հնարավորթյան դեպքում, համագործակցության եզրեր գտնել այդ առաջատար հրատարակչության և Մխիթար Սեբաստացի կրթահամալիրի միջև:
Հարգանքով՝
Արմեն Մարտիրոսյան
Մխիթար Սեբաստացի կրթահամալիրի ավագ դպրոցի հասարակագիտության ուսուցիչ:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
