Նկարագրություն:
Ռաբաթ ամրոցի հիմնադրման պատմությունը իր արմատներով գնում է դեպի 1578թ, երբ Ախալցխա քաղաքը գրավվել է օսմանյան զորքերի կողմից, և 1628 թվականին դարձել է Ախալցխայի փաշայության կենտրոնը: Բերդում տեղավորվում էին բոլոր արքունական շինությունները, փաշայի տունը և գլխավոր ախալցխայական մզկիթը, որին կից գործում էր մուսուլմանական արևելքի ամենահարուստ գրադարաններից մեկը: Հարկ է նշել նաև, որ բերդում ապրելու իրավունք ունեին միայն մուսուլմանները:
Ռաբաթ բերդի վերականգնումը սկսվել է 2011թ. մայիսին։ Այդ նպատակով Վրաստանի կառավարությունը պետական բյուջեից տրամադրել է 34 միլիոն լարի։ Ամրոցում տեղակայվել են զբոսաշրջային օբյեկտներ` հյուրանոցներ, սրճարաններ, գինու մառաններ, ամֆիթատրոն: Բերդի բացման արարողությունը տեղի է ունեցել 2012 թ. օգոստոսի 16- ին, որին համերգային ծրագրով հանդես է եկել արմատներով ախլցխացի աշխարհահռչակ շանսոնիե Շարլ Ազնավուրը: Համերգից հետո Վրաստանի նախկին նախագահ Միխայիլ Սահակաշվիլին շանսոնիեի հետ բացել է Շառլ Ազնավուրի անվան աստղը:
