Խորհրդային Միության փլուզումից հետո արդեն 20 տարուց ավելի է անցել: Այս անցած ամբողջ ժամանակաշրջանին իրականում ավելի շատ բնորոշ են եղել միջպետական հակամարտությունները, ազգամիջյան փոքրիկ բախումները և նույնիսկ` պատերազմները: Չեմ ուզում օրինակներ բերել: Դրանք բոլորին են հայտնի: Լուրերն այդ հակամարտությունների մասին ողողել են ամբողջ մեդիա աշխարհը: Պատկերն այնպիսին է, որ ժողովուրդների բարեկամության մասին պնդումներ, հայտարարություններ կարելի է կարդալ միայն միջպետական դիվանագիտական փաստաթղթերում, բայց անհնար է ժխտել այն միտքը, որ ժողովուրդների իրական բարեկամությունը ստեղծվում է ներքևից, հենց ժողովրդից: Այս առումով անգնահատելի կարևոր գործ են անում Թբիլիսիի թիվ 98 դպրոցի տնօրեն Գեորգի Մոմցելիձեն և «Մխիթար Սեբաստացի» կրթահամալիրի տնօրեն Աշոտ Բլեյանը: Երկու կրթական հաստատությունների համագործակցության 5-րդ տարին է ընթանում: Այս հինգ տարիների ընթացքում հարյուրավոր հայ և վրացի սովորողներ ու դասավանդողներ փոխայցելություններ են կատարել Երևան և Թբիլիսի, համատեղ նախագծեր իրականացրել: Այդ նախագծերն իրականություն են դարձել նաև ծնողների շնորհիվ, ովքեր իրենց տանն են հյուրընկալել հարևան երկրի երեխաներին: Արդեն ավանդույթ է դարձել վրացերենի տոնը մեր կրթահամալիրում նշելը, որին արդեն չորրորդ անգամ մասնակցում է նաև Վրաստանի արտակարգ և լիազոր դեսպան Թենգիզ Շարմանաշվիլին: Սա հետխորհրդային անկախ երկրների ժողովուրդների միջև եղած իրական բարեկամության լավագույն դրսևորումներից է:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
