Երեկ մենք գնացել էինք Թալին և եղանք Մաստարա գյուղում: Նախ այցելեցինք Մաստարայի դպրոց, ծանոթացանք սովորողների և ուսուցիչների հետ: Աշակերտները մեզ պատմեցին իրենց դասերի մասին, պատմեցին իրենց գյուղի հերոսների մասին, իմացանք, թե ովքեր են եղել նրանց նախնիները: Գյուղը հնուց ունեցել է իր բնակչությունը, բայց 1915 թվականից հետո այստեղ հաստատվել են Մուշից, Ալաշկերտից ու Խնուսից գաղթած շատ ընտանիքներ: Իսկ մենք պատմեցինք մեր մասին, Դավիթը ներկայացրեց մեր դպրոցում իրականացվող մեդիակրթության մասին, Աստղիկը պատմեց առավոտյան ընդհանուր պարապմունքների մասին, Թինա ու Լաուրան՝ մեր ապակեպատ դասարանների ու դասերի մասին: Հետո մենք միասին քայլեցինք դեպի գյուղի եկեղեցին՝ Սուրբ Հովհաննես: Տիկին Մարինեն պատմեց իրենց եկեղեցու մասին: Շուտով Սուրբ Հովհաննես եկեղեցու բակում մեզ միացան 11-րդ դասարանցիները ուսուցչի հետ: Մենք իմացանք, որ իրենց եկեղեցին ոչ թե 7-րդ դարի եկեղեցի է, այլ 5-րդ դարի: Մեզ ասացին, որ երբ տարիներ առաջ Գերմանիայից հնէաբան է եկել, նրա պեղումների արդյունքում է պարզվել, որ եկեղեցին 5-րդ դարի է: Մաստարայից Թալին գնալու ճանապարհին մեր վարորդը մեզ անակնկալ արեց և կանգնեց Սողոմոն Թեհլերյանի հուշարձանի մոտ: Պատվելի Թամարը պատմեց Սողոմոն Թեհլերյանի մասին, լուսանկարվեցինք ու շարունակեցինք մեր ճամփան: Իսկ հետո մենք եղանք Թալինի բերդում, որը Թալին քաղաքից գտնվում է 4 կմ հեռավորության վրա՝ Դաշտադեմ գյուղի մոտ: Մենք բոլորով բարձացանք բերդի պարիսպների վրա, մտանք բերդի եկեղեցին, որը Սուրբ Սագիսի անունով էր, գաղտնարանը, հետո իջանք և նախաճաշեցինք: Իսկ հետո գնացինք Թալինի Սուրբ Կաթողիկե եկեղեցին, որը մասամբ քանդված էր: Երեկոյան լավ տպավորություններով վերդարձանք Երևան:
Գեղամյան Արամ, 11-րդ դասարան