Համայնքային միջավայրին սերտաճած կրթահամալիրների մոդելի կիրառումը Հայաստանի բազմաբնակավայր համայնքներում կարող է արդյունավետ լուծում լինել այն բնակավայրերի համար, որոնք ունեն մանկապարտեզներով, մշակութային և սպորտային հաստատություններով ապահովված լինելու խնդիր։ Այսօր այցելեցի «Մխիթար Սեբաստացի» կրթահամալիր, որի տնօրեն Աշոտ Բլեյանի ուղեկցությամբ շրջեցի կրթահամալիրի դպրոց-պարտեզներով, ուսումնական լողավազաններով և ձիարշավարանով, այնուհետև այցելեցի միջին և ավագ դպրոցներ և ծանոթացա ուսումնական պայմաններին։
Շրջայցի ընթացքում պարոն Բլեյանը հանգամանորեն ներկայացրեց ուսումնական հաստատության կրթական ծրագրերը, որոնցում հատկապես մեծ նշանակություն է հատկացված երեխայի մարմնակրթությանը, ստեղծված են ինքնակազմակերպման և ինքնաբացահայտման համար անհրաժեշտ պայմաններ։
Ինքս բարձր տպավորություններ ունեմ կրթահամալիրի ուսուցման գործընթացի կազմակերպման այլընտրանքային ձևաչափից։ Ստեղծված միջավայրը հնարավորություն է տալիս երեխային հաղորդակից լինել բնությանը, չօտարվել համայնքային կյանքից, զարգացնել ազատ ու պատասխանատու քաղաքացու հատկանիշները։
Սուրեն Պապիկյանի ՖԲ էջից։