Բնագիտա-տեխնիկական ստեղծագործական հանրակրթական ամենամյա ստուգատեսի 2-րդ օրվա ծրագիրը կրկին հագեցած էր: Այն ամփոփվեց կրթահամալիրի աշխատողների ամենշաբաթյա միասնական սեմինար-կլոր սեղանով:
Աշխատեցինք խմբերով: Իմ խմբի հետ սեմինարն անցկացրեցին Հասմիկ Նալբանդյանն ու Սուսան Սահակյանը:
Սեմինարի թեման՝ «Բնագիտությունը դպրոցում»:
Յուրաքանչյուրը ներկայացրեց սովորողի բնագիտա-տեխնիկական գործունեության կազմակերպման սեփական փորձը, այլոց փորձի ուսումնասիրությունը:
Որպես իր փորձի նկարագրություն ու եզրակացություն՝ Հասմիկ Նալբանդյանը առանձնացրեց «Բնագիտական գիտելիքների անհրաժեշտությունը դասվարների և դաստիարակների համար», «Երեխաները`երեխաների համար. «Բնագետիկ» ամսագրի ծնունդը 2006-07թթ», «Բնագիտական խաղալիքներ», «Գիտական լեզվամտածողություն» կետերը:
Բնագիտությունը դպրոցում ամենուր է. նախակրթարանում ուսուցվում է դիտարկումների-խաղերի-փորձերի շնորհիվ. բերվեցին օրինակներ:
Միջին դպրոցում՝ էլի փորձեր, որոնք հանգեցնում են կարողությունների, հմտությունների ձեռքբերմանը:
Ավագ դպրոցում բնագիտությունն ուսումնասիրվում է նախագծերի միջոցով. արդյունքում ստեղծվում են սարքեր, մոդելներ:
Ընդգծվեց համապատասխան գրականության թարգմանությունների դերը:
Էկոլոգիական ծրագիրը կարևորվեց որպես բնագիտական կրթության շարունակություն:
Սուսան Սահակյանը ներկայացրեց Միջին դպրոցի սովորողների «Մենդելեևի աղյուսակ» աշխատանքը, որը, որպես ուսումնական նյութ, հետաքրքիր է և ուսանելի, նկարագրեց ուսումնական ճամփորդությունները: