Նախադպրոցական կրթություն. 5 տարեկանների ուսուցում

2013-2014 ուստարի

Ուսումնական պլան

Ուսպլան

5 տարեկանների ուսուցում

2013-2014 ուստարի

Ուսումնական պլանի պարզաբանումներ

1. Ուսումնական պլանը «Ստեղծողի դպրոց. անհատի կրթական պատվեր. մեդիակրթություն» հեղինակային (պետական այլընտրանքային) կրթական ծրագրի (այսուհետ` Ծրագիր) հավելվածն է:
2. 5 տարեկանների նախապատրաստական ուսուցման դասարանները (խմբերը) գործում են կրթահամալիրի Նոր դպրոցում,  Դպրոց-պարտեզում, Գեղարվեստի կրտսեր դպրոցում, Հիմնական դպրոցում (այսուհետ` Դպրոց):
3. Նախապատրաստական ուսուցման խումբ ընդունվում է այն երեխան, ում 5 տարին լրանում է մինչև 2014թ. դեկտեմբերի 31-ը, ծնողն ընտրում է Ծրագիրը և սահմանված կարգով կնքում  ուսումնառության պայմանագիր :
4. Խմբում սաների թիվը 20-25 է:
5. Ուսումնական պլանի պարզաբանումներում նշված կարգերը ուսումնական պլանի հավելվածն են: Դրանցում փոփոխությունները դպրոցի ղեկավարի ներկայացմամբ հաստատում է կրթահամալիրի տնօրենը:
6. Ուսումնական պլանի իրականացումը կազմակերպվում է ուսումնական նախագծերի, ուսումնական օրացույցով որոշված ծեսերի-տոների կազմակերպմամբ,  սահմանված կարգով:
7. Գործունեության ղեկավարը խմբի դաստիարակն է։ Շաբաթվա, օրվա գործունեության նախագծերը հրապարակվում են սահմանված կարգով:
8. Դաստիարակը  վարում է Դպրոցի կայքում հրապարակված անձնական ուսումնական բլոգը: Ուսումնական բլոգի, ենթակայքի միջոցով խմբի, սանի գործունեությունը, արդյունքները հրապարակայնանում են։ Սաների ձեռք բերած հմտություններն ու  կարողությունները սահմանված կարգով ներկայացվում են նաև տոների-ծեսերի, սպորտային միջոցառումների, ներկայացումների միջոցով, ստուգատեսներում:
9. Սանի հաճախումները, գործունեության արդյունքների մասին անհրաժեշտ տեղեկությունները սահմանված կարգով էլեկտրոնային գրանցում են ստանում:
10. Սանի գործունեությունն ամեն օր սկսվում է  առավոտյան ծեսով, որը ներառում է ինքնասպասարկում,  ներկայության գրանցում, միջավայրի խնամք, ուրախ մարմնամարզություն:
11. Խումբը սահմանված կարգով մասնակցում է կրտսեր դպրոցի ընդհանուր պարապմունքին:
12. Մարմնամարզությունը, ազգային շարժուն խաղերը, լողը, հեծանվավարությունը, պարը մարմնակրթության բաղկացուցիչն են:
13. Խոսքի զարգացումն իրականացվում է հաշվերգերի, խաղիկների, շուտասելուկների, հեքիաթների, խաղ-ներկայացումների, սաների զրույցների, պատմությունների, մեդիանյութեր ստեղծելու և այլ գործնական կիրառությունների միջոցով: Թատրոնը բանավոր խոսքի զարգացման ձևերից է:
14. Թվաբանական հմտությունների ձևավորումն իրականացվում է որպես առօրյա խնդիրների ձևակերպում, լուծում՝ խոհանոցային, բնագիտական, տեխնոլոգիական, ծիսական, ուսումնական ճամփորդության և այլ:
15. Մեդիատեխնոլոգիական հմտությունների զարգացումն իրականացվում է գործնական աշխատանքով, նաև ծնողների աջակցությամբ:
16. Բնագիտական գործունեությունը ներառում է բույսերի և կենդանիների, շրջակա միջավայրի խնամքը, բուսաբուծություն, կենդանաբուծություն, դիտարկումներ և զննումներ մանրադիտակով, խոշորացույցով, աստղադիտարանում, աստղադիտակով,  բնագիտական փորձերը, ճամփորդությունները, հիգիենան:
17. Կերպարվեստ-տեխնոլոգիական գործունեությունը ներառում է համակարգչային ծրագրերով նկարչություն, ջրանկար, ծեփ, խոհանոցային գործունեություն, տիկնիկագործություն:
18. Երաժշտությունը ներառում է երգի, երաժշտական խաղերի, պարի ուսուցում, երաժշտության ունկնդրում, ռիթմիկ խաղեր, շրխկանների, այլ երաժշտական պարզ գործիքների գործածում գործունեության ընթացքում:
19. Խմբի գործունեության ծրագիրը, արդյունքները, անհրաժեշտ այլ տեղեկությունները սահմանված կարգով հրապարակվում են:
20. Սահմանված կարգով իրականացվող ուսումնական ճամփորդությունները ուսումնական գործունեության  բաղկացուցիչն են:
21. Դաստիարակը սահմանված կարգով լրացնում է   սանի գնահատման թերթիկը (սանի արժեքային համակարգի, նրա կողմից յուրացված հմտությունների, կարողությունների որակական բնութագիրը, սովորողի զարգացման մոտակա պլանը)։
22. Կրթական ծրագրի, ուսումնական պլանի կատարողականն արտացոլվում է Դպրոցի ղեկավարի, դաստիարակի սահմանված կարգով ներկայացվող էլեկտրոնային կիսամյակային հաշվետվություններում:
23. 2014թ. փետրվարի մեկին սաները սահմանված կարգով տեղափոխվում են առաջին դասարան, և նրանց գործունեությունը կազմակերպվում է կրթահամալիրի առաջին դասարանի առաջին կիսամյակի ուսպլանով: