2013-2014 ուստարի
Նախադպրոցական կրթություն
Ուսումնական պլան
Գործունեություն
|
Շաբաթական ժամաքանակ
|
Առավոտյան ծես
|
3
|
Խոսքի զարգացում, թատրոն
|
8
|
Ուսումնական ճամփորդություն
|
1
|
Բնագիտական գործունեություն
|
2
|
Երաժշտություն, պար, խաղ
|
3
|
Կերպարվեստ, տեխնոլոգիա
|
2
|
Մարմնակրթություն
|
4
|
Ազատ գործունեություն, խաղեր
|
4
|
Քուն
|
8
|
Սնունդ
|
5
|
Ընդամենը
|
40
|
Ուսումնական պլանի պարզաբանումներ
- Ուսումնական պլանը «Ստեղծողի դպրոց. անհատի կրթական պատվեր. մեդիակրթություն» հեղինակային (պետական այլընտրանքային) կրթական ծրագրի (այսուհետ` Ծրագիր) հավելվածն է: Նախադպրոցական կրթական ծրագրի խմբերը գործում են կրթահամալիրի Նոր դպրոցում, Դպրոց-պարտեզում, Գեղարվեստի կրտսեր դպրոցում, Հիմնական դպրոցում (այսուհետ` Դպրոց):
- Ուսումնական պլանի պարզաբանումներում նշված կարգերի փոփոխությունները Դպրոցի ղեկավարի ներկայացմամբ հաստատում է կրթահամալիրի տնօրենը:
- Նախակրթարան ընդունվում են 2-5 տարեկան երեխաները, ում ծնողները (օրինական ներկայացուցիչները) ընտրում են ծրագիրը, սահմանված կարգով պայմանագիր կնքում երեխայի խնամքի և զարգացման մասին:
- Խումբը տարատարիք է։ Խմբում սաների թիվը 20-25 է:
- Ուսումնական շաբաթը` երկուշաբթիից ուրբաթ`ժամը 9.00-17.00:
- Ուսումնական պլանի իրականացումը կազմակերպվում է խաղի-ազատ գործունեության միջոցով, ուսումնական նախագծերի, ուսումնական օրացույցով որոշված ծեսերի-տոների կազմակերպմամբ, սահմանված կարգով:
- Սաների գործունեության ղեկավարները նախակրթարանի դաստիարակն ու նրա օգնականն են։ Շաբաթվա, օրվա գործունեության նախագծերը հրապարակվում են սահմանված կարգով:
- Նախակրթարանի դաստիարակը, դաստիարակի օգնականը վարում են Դպրոցի կայքում հրապարակված անձնական ուսումնական բլոգներ: Ուսումնական բլոգի, ենթակայքի միջոցով նախակրթարանի, սանի գործունեությունը, արդյունքները հրապարակայնանում են։ Սաների ձեռք բերած հմտություններն ու կարողությունները սահմանված կարգով ներկայացվում են նաև տոների- ծեսերի, սպորտային միջոցառումների, ներկայացումների միջոցով, ցուցադրություններով, ցուցահանդեսներով, ստուգատեսներում:
- Սանի հաճախումները, գործունեության արդյունքների մասին անհրաժեշտ տեղեկությունները սահմանված կարգով էլեկտրոնային գրանցում են ստանում:
- Սանի գործունեությունն ամեն օր սկսվում է առավոտյան ծեսով, որը ներառում է ինքնասպասարկում (հանվել-հագնվել, տեղավորել շորերը, իրերը), ներկայության գրանցում, միջավայրի` սենյակի, բակի, բույսերի, կենդանիների խնամք, ուրախ մարմնամարզություն, խաղիկ-հաշվերգ, երգ-խաղ-պար:
- Մարմնամարզությունը, հիգիենան, ազգային շարժուն խաղերը, լողը, հեծանվավարությունը, պարը մարմնակրթության բաղկացուցիչն են:
- Սաների առողջական և ֆիզիկական վիճակի վերահսկողությունն իրականացնում է բուժքույրը, ով տարեկան 2 անգամ լրացնում է սանի թերթիկը, համապատասխան կարգով վերահսկում է ամառային լողափի գործունեությունը:
- Գործունեության բացօթյա կազմակերպումը՝ տաք եղանակներին շուրջօրյա (ամառային պարտեզ, լողափ), ցրտին՝ մինչև 3 ժամ (ձմեռային պարտեզ), պարտադիր է և դիտվում է որպես սովորողի իրավունքների իրագործում:
- Սահմանված կարգով իրականացվող ուսումնական ճամփորդությունները ուսումնական գործունեության բաղկացուցիչն են:
- Խոսքի զարգացումն իրականացվում է հաշվերգերի, խաղիկների, շուտասելուկների, ոտանավորների, հեքիաթների, թատերական խաղ-ներկայացումների, սաների զրույցների, պատմությունների միջոցով: Թատրոնը բանավոր խոսքի զարգացման ձևերից է: Սաների արտասանական ապարատի զարգացման նպատակով կազմակերպվում են երաժշտական, ռիթմիկ, արտասանական խաղեր և վարժություններ:
- Բնագիտական գործունեությունը ներառում է բույսերի և կենդանիների, շրջակա միջավայրի խնամքը, բուսաբուծություն, կենդանաբուծություն, դիտումներ և զննումներ մանրադիտակով, խոշորացույցով, բնագիտական փորձեր, հիգիենա, ճամփորդություն:
- Կերպարվեստ-տեխնոլոգիական գործունեությունը ներառում է ջրանկար, ծեփ, խոհանոցային գործունեություն, տիկնիկագործություն, համակարգչային հմտություններ:
- Երաժշտությունը ներառում է երգի, երաժշտական խաղերի, պարի ուսուցում, երաժշտության ունկնդրում, ռիթմիկ խաղեր, շրխկանների, երաժշտական այլ պարզ գործիքների գործածում գործունեության ընթացքում:
- Խմբի գործունեության ծրագիրը, արդյունքները, անհրաժեշտ այլ տեղեկությունները սահմանված կարգով հրապարակվում են:
- Սահմանված կարգով իրականացվող ուսումնական ճամփորդությունները ուսումնական գործունեության բաղկացուցիչն են:
- Դաստիարակը սահմանված կարգով լրացնում է սանի գնահատման թերթիկը (սանի արժեքային համակարգի, նրա կողմից յուրացված հմտությունների, կարողությունների որակական բնութագիրը, սովորողի զարգացման մոտակա պլանը)։
- Կրթական ծրագրի, ուսումնական պլանի կատարողականն արտացոլվում է նախակրթարանի ղեկավարի, դաստիարակների սահմանված կարգով ներկայացվող էլեկտրոնային կիսամյակային հաշվետվություններում: