Հուլիսի 31-ին Արմավիրի մարզ կենսամշակութային արշավին կրթահամալիրի խմբի հետ մասնակցում էր «Հայաստանի մանուկներ» հիմնադրամի հայաստանյան գրասենակի գործադիր տնօրեն Սերոբ Խաչատրյանը։ Ճամփորդության արդյունքը հիմնադրամի հետ գործընկերության պայմանավորվածությունն է։ Ծանոթացեք կրթահամալիրի և հիմնադրամի հայաստանյան գրասենյակի տնօրենների նամակագրությանը։
«Հարգելի Սերոբ Խաչատրյան, նորից իմ գոհունակությունն եմ հայտնում հուլիսի 31-ի մեր համատեղ կրթամշակութային արշավից։ Սա մենք դիտում ենք նաև մեր հեռանկարային գործընկերության հաջող մեկնարկ։ Կոնկրետ և հետևողական լինելու համար.
- մինչև 2013-2014 ուսումնական տարվա սկիզբը մենք պատրաստ ենք կնքել համագործակցության հուշագիր (համաձայնագիր). եթե ունեք այդպիսի օրինակ, խնդրում եմ այն տրամադրել մեզ.
- օգոստոս ամիսը, երբ Արմավիրի մարզի մանկապարտեզները (դպրոցների նախակրթարանները) գործում են արձակուրդային ռեժիմում, հարմար ժամանակ է հիմնադրամի աջակցությամբ ստեղծված, գործող և մարզի այլ նախադպրոցական հաստատությունների մանկավարժական աշխատողների` վարիչների, մանկավարժների, դաստիարակների և նրանց օգնականների, երաժշտության դաստիարակների վերապատրաստումը կազմակերպելու համար. օգոստոսի 10-20-ը առաջարկում ենք եռօրյա վերապատրաստում կրթահամալիրում.
- սեպտեմբեր-հոկտեմբեր ամիսներին պատրաստ ենք կրթահամալիրում ընդունելու Քարակերտի դպրոցի վոլեյբոլի, Լեռնագոգի բասկետբոլի աղջիկների հավաքական թիմերին, դպրոցների նորարար ուսուցիչների խմբերին.
- օգոստոսի 10-15-ը Լոռու մարզում ՀԲԸՄ «Անդրանիկ» սկաուտական ճամբարի տարածքում գործելու է կրթահամալիրի բնագիտական-տիեզերագիտական-տեխնիկականստեղծագործությանամառայինբացարշավախմբային-հայրենագիտական ճամբարը. հրավիրում ենք Ձեր աջակցությամբ ամենատարբեր նախագծեր իրականացնող 7-12-րդ դասարանիցների 10-12 հոգիանոց մի ջակատի` մասնակցելու ճամբարին. մանրամասներին կարող եք ծանոթանալ ճամբարի բլոգում.
- սեպտեմբերի 21-ին կրթահամալիրի առաջարկում ենք Քարակերտի, Լեռնագոգի դպրոցների սովորողների, ուսուցիչների հետ հաղթահարել Արտենիի բարձունքը և ազդարարել «Մաքուր երգող գյուղ» նախագծի մեկնարկը։
Հարգանքով` կրթահամալիրի տնօրեն Աշոտ Բլեյան»
«Շնորհակալություն «Մխիթար Սեբաստացի» կրթահամալիրի ղեկավարությանը և «Սեբաստացիներ» երգչախմբին երեկվա անմոռանալի այցի համար։ Շատ հետաքրքիր և բովանդակալից օր էր։
Շատ շնորհակալություն նամակի համար։ Մենք շատ արագ կպատասխանենք Ձեզ։
Հարգանքով` Սերոբ Խաչատրյան»
