Գոյություն ունեն հազարավոր հիվանդություններ, բայց առողջությունը մեկն է:
ՈՐՈՎԱՅՆԻ ՑԱՎ
Կրթահամալիրի առողջապահական ծառայություն հաճախ են դիմում սովորողները՝ որովայնային ցավերով:
Որովայնային ցավերը մեծ մասամբ կրում են ոչ լուրջ ու ժամանակավոր բնույթ, և որոշակի միջոցներով, խորհուրդներով բուժումը այն ամենն է, ինչ անհրաժեշտ է կատարել ցավերը մեղմելու նպատակով: Սակայն, մյուս կողմից, որովայնային ցավերը կարող են լինել չափազանց լուրջ հիվանդության դրսևորում, որոնք պահանջում են անհապաղ բժշկական միջամտություն:
Որովայնային ցավերի առաջացման պատճառները բազմաթիվ են: Դրանցից են.
- անկանոն սնվելը և աղիների անկանոն դատարկելը
- սննդակարգը / սննդային ալերգիա կամ որոշ սննդատեսակների նկատմամբ անհանդուրժողականություն /
- չափից ավելի թթու, կծու, սառը, ճարպոտ սննդի ընդունումը
- դաշտանը
- մակաբուծային աղիքային վարակները / ճճվակրություն, լյամբլիոզ /
- լեղաքարային հիվանդությունը
- որդանման ելունի բորբոքումը
- սննդային թունավորումը
- փորլուծությունը
- միզուղիների վարակները
- երիկամային քարերը
- կոնքի խոռոչի օրգանների բորբոքային հիվանդությունները / ձվարանների, արգանդափողերի բորբոքում /
- պարբերական հիվանդությունը
- վնասվածքները
- որոշ դեղամիջոցներ:
Ցավի տեղակայումն ունի կարևոր ախտորոշիչ նշանակություն: Այսպես՝
- որովայնի վերին հատվածներում տեղակայված ցավը կարող է հուշել կերակրափողի, ստամոքսի հիվանդությունների մասին
- լեղաքարային հիվանդությանը և լյարդաբորբին բնորոշ ցավերը արտահայտվում են վերորովայնային շրջանի աջ կեսում և կարող են ճառագայթվել դեպի աջ՝ թիակի ստորին հատված
- խոցային հիվանդության և ենթաստամոքսային գեղձի բորբոքումների դեպքում
- ցավերը ճառագայթում են մեջքի շրջան
- բարակ աղիների ախտահարման դեպքում / ճիճվակրության ժամանակ /ցավերը տեղակայվում են պորտի շուրջը, իսկ հաստ աղու խանգարումների ժամանակ՝ որովայնի միջին հատվածում կամ պորտից ներքև:
Որովայնի ցավը կանխելու համար
- եթե դուք ունեք թեթև որովայնի ցավ՝ առանց այլ ախտանիշների, հանգստացեք, մինչև ավելի լավ զգաք
- խմեք բավարար քանակով հեղուկներ
- խուսափեք գազավորված ըմպելիքներից
- սնվեք հաճախ՝ փոքր չափաբաժիններով
- խուսափեք ընդունել կծու, ճարպոտ և համեմունքներով հարուստ սնունդ, ալկոհոլ, մրգեր
- մի ընդունեք ասպիրին կամ այլ հակաբորբոքիչ դեղամիջոցներ ցավը մեղմելու համար. դրանք կարող են գրգռել ստամոքսը և ավելի ուժեղացնել ցավերը
- սովորություն դարձրեք սնունդն ընդունել և աղիները դատարկել կանոնավոր կերպով:
Անհրաժեշտ է դիմել բժշկի, եթե
- ցավն ուժգնանում է կամ կենտրոնանում որովայնի որևէ հատվածում
- ցավը չի մեղմանում 24-48 ժամ անց
- որովայնի ցավին միանում են այլ ախտանշաններ՝ փորլուծություն, փսխում, մեզի գույնի փոփոխություն, ջերմություն
- նկատում եք քաշի անբացատրելի կորուստ:
Առողջ եղեք:
