Ծովային հիվանդություն
Կան մարդիկ, որոնց համար ցանկացած ուղևորություն կամ ճամփորդություն ծանր փորձության է վերածվում: Անկախ նրանից, ինքնաթիռով եք ճանապարհորդում, նավով, թե ավտոմեքենայով, հաճախ կարող եք ունենալ թուլություն, գլխապտույտ, սրտխառնոց, փսխում: Հիվանդությունը կոչվում է «Ծովային հիվանդություն»:
Երջանիկ ճանապարհորդները կազմում են մարդկանց 6-8 տոկոսը, որոնք չեն տառապում այսպես կոչված ծովային հիվանդությամբ: Ավելի հեշտ են տանում ճանապարհը 60-ից բարձր տարիք ունեցողները, երեխաներից` ավելի շատ աղջիկները, քան տղաները:
Ծովային հիվանդությունը կամ կինետոզը առաջանում է ներքին ականջում տեղադրված վեստիբուլյար ապարատի գերդրդումից: Շրջապատող իրերը երկար ժամանակ տեղաշարժվում են աչքերի առջևով, որից մարդու մոտ առաջանում է թուլություն, գլխապտույտ, սրտխառնոց և անզուսպ փսխում:
Մինչև 2 տարեկան երեխաները գրեթե չեն ունենում ճանապարհների տհաճ զգացումներ, պատահական չէ, որ նրանք սիրում են ճոճվել օրորոցում, ճոճանակների վրա, պտտվել խաղերի ժամանակ և այլն: Մինչդեռ, մեծահասակներից ոմանք, կարող են վատանալ նույնիսկ մի պահ նայելով պտտվող ճոճանակներին:
Խորհուրդ է տրվում`
ուղևորությունից մի քանի շաբաթ առաջ մարզել վեստիբուլյար ապարատը`
· ճոճել գլուխը, կռանալ առաջ և կողքի,
· պառկել որովայնի վրա, կախել գլուխը բազմոցից,
· ջրավազանում լողալով ստեղծել արհեստական ճոճում` մարմինը թեքելով մեկ մի կողքի, ապա մյուս,
· պարել վալս և նման վարժություններ:
Անմիջապես ուղևորությունից առաջ`
· լավ քնել,
· թեթև սնվել,
· չծխել և չօգտագործել ալկոհոլային խմիչքներ,
· չօգտագործել ուժեղ բույր ունեցող օծանելիքներ:
Ճանապարհ ուղևորվելու ժամանակ`
· չկենտրոնանալ տհաճ զգացումների վրա,
· խուսափել ծանր օդից, միացնել օդորակիչը, բացել պատուհանները,
· Ճանապարհին պետք է ձեռքի տակ ունենալ լիմոնի կտորներ, անանուխի կարամել, ծամոն, իմբիրով թեյ,
· խմել սառր ջուր,
· բերանը դնել մի կտոր սառույց կամ պաղպաղակ:
Բժիշկ-առողջագետ` Նելլի Այվազյան