Հունվարի 29-ին, Երևանի Ամերիկյան անկյունում (Ավ. Իսահակյանի անվան կենտրոնական գրադարան) Armenian eBooks նախաձեռնությունը կազմակերպել էր «Թերթելով էջերը. էլեկտրոնային գրքի մշակույթը Հայաստանում» քառամսյա ծրագրի սեմինար-քննարկում: Սեմինար-քննարկմանը կրթահամալիրից մասնակցում էին Զարուհի Առաքելյանը և Անահիտ Հարությունյանը:
Սեմինար-քննարկումը մեկնարկեց ԱՄՆ շրջանավարտների ասոցացիայի գործադիր տնօրեն Ալեքսանդր Շագաֆյանի ողջույնի խոսքով: Ծրագիրը իրականացվում է Հայաստանում ԱՄՆ դեսպանության ԱՄՆ շրջանավարտների դրամաշնորհային ծրագրի շրջանակներում: Սեմինարավարներ Մարատ Յավրումյանը և Ռուբեն Միրաքյանը ծրագրի առաջին մասում ներկայացրեցին էլեկտրոնային գրքերի ստեղծման և տարածման առանձնահատկությունները, էլեկտրոնային գրախանութներից ու շտեմարաններից, էլեկտրոնային գրքերի ընթերցիչներից օգտվելու սեփական փորձը: Քննարկվեցին էլեկտրոնային գրահրատարակչության խնդիրներն ու հեռանկարները, զարգացման հիմնական մոդելները, Հայաստանում գործող նախաձեռնությունները:
Սեմինարի երկրորդ մասը գործնական էր. նախապես ներբեռնած Jutoh ծրագրի միջոցով Էդգար Ալան Պոյի պատմվածքների ժողովածուն փորձեցինք էլեկտրոնային գիրք դարձնել:
Սեմինարը հետաքրքիր էր, գործնական: Հեռավար աշխատելու ու հետագա համագործակցության պայմանավորվածություն ձեռք բերվեց:
Գլխավոր լուսանկարը՝ Հայաստանի ԱՄՆ շրջանավարտների ասոցացիայի ֆեյսբուքյան էջից:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
