Ի՞նչ է նշանակում պատկանել քաղաքակրթութեանը։
Դա նախ եւ առաջ սեփական միտք ստեղծելու ընդունակութիւնն է:
Տիգրան Հայրապետյան
Անկախությունն էթնոսների արժեքային համակարգի կարևորագույն բաղկացուցիչն է, քանզի պետությունն ազգի ինքնակազմակերպման և արտաքին դրսևորման բարձրագույն ձևն է: Բնական է, որ Տիգրան Հայրապետյան մտածողին պետք է մտահոգեին անկախության ռազմավարության հիմնախնդիրները: Մեր կարծիքով Տիգրան Հայրապետյանի «1994թ. անկախության ռազմավարություն» հոդվածը քաղաքագիտության այս ոլորտի արդիաշունչ և հեռանկար մատնանշող տեքստերից է: Նրա իրատեսությունը և խորաթափանցությունն օրինակելի են արդի պետական, քաղաքական և հասարակական գործառույթներ կատարող գործիչների համար: Դատեք ինքներդ. «Հաղորդակցության միջոցների եւ մեթոդների զարգացվածության ներկա աստիճանը պահանջում է որեւէ պետության՝մեծից մինչեւ ամենափոքրը, անկախ գոյության փաստի որակապես նոր ընկալում, որը խիստ տարբերվում է անկախության այն գիտակցությունից, որ հատուկ էր բոլոր նախորդ դարաշրջաններին» (Եվ սա գրված է 19 տարի առաջ):
Տիգրան Հայրապետյանն իր գաղափարաբանությունում միավորում էր շատերի համար անհամատեղելի թվացողը` ազատականությունը և ազգայնականությունը. «Անկախ ժամանակից ու կոնկրետ իրավիճակից, քանի դեռ հայ հավաքականությունը կպահպանվի իբրեւ պատմության թատերաբեմում լիարժեք կենսագործունեության հեռանկարի հավակնող ժողովուրդ (դրա այլընտրանքն անցումն է լիակատար գետտոյական կենսաձեւին ինչպես Սփյուռքում այնպես էլ հայրենիքում), ազգային ռազմավարության հենքում պետք է մնա ազատ, անկախ եւ միացյալ Հայաստանի իդեալը, իբրեւ հայ ժողովրդի՝ ինչպես ողջ հավաքականության, այնպես էլ առանձին վերցրած յուրաքանչյուր անհատի ազատ կյանքի, ազատ կամքի եւ ազատ ինքնադրսեւորման հնարավորություններն ապահովելու կոչված միջոց»:
Այսօր, երբ վտանգված է ՄԵՐ ՊԵՏՈՒԹՅՈՒՆԸ, երբ սեփական միտք ստեղծելու ընդունակությունը դժվարությամբ դիմակայում է ատոմացվող հասարակության քաոսին և գործող իշխանությունների այլասերող պահվածքին, Տիգրան Հայրապետյանի Ժառանգությունը վերընթերցման և գործնականացման անհրաժեշտություն է թելադրում ՀՀ քաղաքացիներին: Համոզվե´ք ինքներդ: