Այսօր կրթահամալիրի հյուրերը ուսուցիչներ, ուսմասվարներ և տնօրեններ էին, ովքեր եկել էին Արմավիրի մարզի տարբեր համայնքներից: Նրանք վերապատրաստվում են` որպես վերապատրաստողներ, և այցելել են մեզ, քանի որ ցանկանում են ծանոթանալ մեր կրթությանը, տեխնոլոգիաների կիրառմանը:
Մենք մեր հյուրերին ուղեկցեցինք դեպի Նոր դպրոց: Նոր դպրոցում մեզ դիմավորեցին մեծ ուրախությամբ, և հյուրերի հետ միասին շրջեցինք դասասենյակներով: Հյուրերը, տեսնելով Լուսինե Փաշայանի դասարանը, զարմացած էին մնացել (այսքան փոքր տարիքի երեխաներ ու այդքան շատ համակարգչային հմտություններ): Նոր դպրոցի ղեկավար Նաիրա Նիկողոսյանը պատմեց դպրոցի ուսումնական պարապմունքների և առավոտյան ընդհանուր պարապմունքի մասին: Հյուրերը հիացած էին:
Նոր դպրոցից եկան Միջին դպրոց: Այստեղ էլ ոգևորվեցին` տեսնելով մեր գրադարանի հնարավորությունները, համակարգչային կենտրոններն ու բնագիտական փորձասենյակների հագեցվածությունը:
Ծանոթացան կայքին, թվային գրադարանի ստեղծման աշխատանքներին և հասկացան, որ կա մեդիա` կա կրթություն...
Կարծում եմ, որ այցելությունը կրթահամալիր մեր հյուրերին օգտակար եղավ: Ինչպես նրանց հետ շրջելը` մեզ: