Իմ պայծառ, մտազբաղ, անհանգիստ, սրտալի փոքր քույր, ծնունդդ շնորհավո'ր: Ծննդյան մաղթանքները ցանկալի և սպասված են լինում անկախ կրկնվելուց: Ուզում եմ միշտ սպասված, գնահատված, արժևորված, չընդհատված և պահանջված լինես ամենուր...Ծնունդդ բարի և բարով լինի...
Տաթև ջան, Չարենցի «Կապույտը» օրվա ընթերցում-նվեր:
Կապույտը հոգու աղոթանքն է, քույր,
Կապույտը — թախիծ.
Կապույտը — կարոտ թափանցիկ, մաքուր,
Ու հստակ, ու ջինջ:
Կապույտը քրոջ աչքերի անհուն
Առավոտն է թաց:
Կապույտում հոգիս մի հին իրիկուն
Անզո՜ր հեծկլտաց:
Կապույտը ծեգին աղոթքի կանչող
Ղողանջն է զանգի:
Կապույտը — արցունք, ու կապույտը — ցող
Հոգու, երկնքի:
Կապույտում անսուտ խոսքեր են հոսում
Երկնքից — երկինք:
Հոգիս — Կապույտի լաբիրինթոսում
Սրբացած կնիք:
Այն, որ չի եղել, որ պե՛տք է լինի
Մանկական սրտում —
Հոսում է, որպես լուսավոր գինի —
Հոգու կապույտում: