Սրբազան, գերբնական Աստվածաշունչ մատյանը լոկ գիրք չէ միայն, այլ նաև մարդկային կյանքի, մտքի և հոգու ներդաշնակության և ճշմարտությունների մի ամբողջություն, որի մասին գրել և դեռևս գրելու են շատ շատերը: Մեծ պահքի շրջանում եկեք միասին հաղորդակից լինենք Աստծո կենդանի խոսքին, աղոթքով զորացնենք մեր հոգիները, լցվենք կենդանարար զորությամբ, դառնանք Աստծո կենդանի տաճարներ: Այս շրջանը մեզ հնարավորություն է տալիս մաքրվելու, զորանալու հավատքով: Գյոթեն ասել է. «Եթե ես բանտարկվեի, և ինձ թույլատրեին վերցնել մեկ գիրք, ես կվերցնեի աստվածաշունչը»: Իսկ Լյութերը ասել է. «Աստվածաշունչը ոչ հնություն է, ոչ էլ ժամանակակից, այն հավիտենական է»: Ահա մի հավիտենականություն, որի ընթերցմամբ հարկավոր է ընկալել աշխարհի և կյանքի իմաստը, բավարարել հոգեմտավոր պահանջներն ու կարիքները: Այն բաղկացած է 75 գրքերից, Հին կտակարան, որը բաղկացած է 48 գրքերից և Նոր Կտակարան` 27 գրքերից: Այն գրվել է տարբեր ժամանակաշրջաններում տարբեր մարդկանց կողմից Աստծո ներշնչմամբ: Աստվածաշունչ անունը մեսրոպյան ոսկեղենիկ հայերենով է միայն վկայում իր առանձնահատուկ ծագման մասին, մյուս եկեղեցիները վաղուց օգտագործում են Biblia հունարեն գիրք բառը: Գտնվելով մեծ պահոց շրջանում՝ պետք է ընթերցել Ավետարանի պատգամները, հաղորդակցվել Աստծո կենդանի խոսքին:
Շատ հաճախ ենք լսում ապաշխարել բառը, որը նշանակում է մաքրվել մեղքերից, ուրեմն եկեք վերափոխենք մեր կյանքի ընթացքը, դառնանք առ Աստված, օգնենք և զորավիգ լինենք մեկ մեկու: Պահոց շրջանի հատուկ աղոթքները, հոգևոր շարականներն ու եկեղեցական արարողությունները պետք է նպաստեն մեր կյանքի վերաիմաստավորմանն ու վերափոխմանը:
Հատված Խաղաղական Ժամերգությունից
Նայեաց սիրով Հայրդ գթած, ի քո ստեղծեալ գործս ձեռաց
եւ ըզբանակս հրեշտակաց, տո'ւր պահապան մեզ տկարաց,
փրկեա' զանձինս ի փորձանաց, ի խաւարի շրջող դիւաց.
զի ի տունջեան եւ գիշերի տացո'ւք քեզ փառս անլռելի:
Սիրով նայիր, ով գթած Հայր, քո ձեռքով ստեղծվածներիս,
եվ հրեշտակների բանակներիդ պահապան կարգիր
մեզ` տկարներիս. փրկիր մեզ փորձանքներց,
խավարի մեջ շրջող դևերից, որպեսզի օր ու գիշեր
Քեզ փառք տանք անդադար: