Մխիթար Սեբաստացի կրթահամալիրում արդեն երրորդ տարին է , ինչ անց է կացվում Էկոտուր էկոլոգիական նախագծերի միջազգային ստուգատեսը: Ստուգատեսը անց է կացվում ԿԳՆ պատվերով և Բնապահպանության նախարարության աջակցությամբ:
Էկոտուրը հասարակության ուշադրությունն է ուղղում էկոլոգիական խնդիրներին և մասնակիցները փորձում են լուծումներ տալ դրանց ուսումնական նախագծերի միջոցով:
Արդեն տրված է Էկոտուր 2014-ի մեկնարկը: Այսօր տեղի ունեցավ առաջին կլոր սեղան- քննարկումը: Քննարկումը կազմակերպվեց Բնապահպանության նախարարության առաջարկով: Ներկայացվեց Էկոտուրի ծրագիրը, էկոճամբարների կազմակերպումը, խոսվեց համագործակցության եզրերի մասին: Եղան փոխադարձ առաջարկներ:
Էկոտուր 2014-ի հաղթողները պարգևատրվելու են ոչ միայն էկոճամբարի ուղեգրով, այլ նախատեսվում է աջակիցների կողմից տրամադրել դրամաշնորհներ, որպեսզի ներկայացված նախագիծը իրագործվի:
Պարոն Բլեյանը կարևորում է և՛ ԿԳՆ, և՛ Բնապահպանության նախարարության աջակցությունը Էկոտուրի կազմակերպման և տարածման մեջ, նա գտնում է, որ հանրապետության բոլոր դպրոցներում պետք է էկոլոգիական կրթությունը լինի առաջնային, և անջրպետը պետք է քանդվի ի շահ բնության պահպանության:
Բնապահպանության նախարարության Կենսառեսուրսների կառավարման գործակալները անչափ ոգևորված էին կատարված աշխատանքներով և հավաստիացրին, որ Կրթահամալիրը ունի իրենց մեծ աջակցությունը:
Այսպիսով կլոր սեղանի արդյունքում առաջարկվեց ուսումնասիրել նաև բնության հուշարձանները, որոնք շատերը նույնիսկ չեն ճանաչում, ԿԳՆ և Բնապահպանության նախարարությունների կողմից համատեղ նամակներով դիմել հանրապետության մյուս դպրոցներին էլ, որպեսզի նրանք էլ ներգրավվեն Էկոտուրի աշխատանքներին, առավել հաջողված նախագծերը ներկայացնել ԾԻԳ-ին առավելագույնս աջակցություն ստանալու համար, համայնքների ղեկավարների աջակցությամբ կազմակերպել Հայաստանի գետերի մաքրման մեծ էկոակցիա, համագործակցել Բնապահպանության նախարարության էկոկրթության բաժնի մասնագետների հետ:
