Տեղեկություն
Կրթահամալիրի ուսուցիչների անունից Արհեստակցական կազմակերպություն նախագահը դիմել էր ՀՀ ֆիզկուլտուրայի, սպորտի և տուրիզմի աշխատողների արհեստակցական ճյուղային կազմակերպությունների հանրապետական միությանը (նախագահ` Կառլեն Հարությունյան) նամակով հետևյալ բովանդակությամբ.
«Մեր կրթահամալիրի աշխատակիցներից շատերը ապրում են խորհրդային տարիներից ստացած բնակարաններում, որոնց` սերունդների հերթափոխության շնորհիվ, բնակելի տարածքը խիստ փոքրացել է և շատ դժվարացել է նրանց համատեղ կյանքը:
Կրթահամալիրում անցկացված սոցիալոգիական հարցման արդյունքում պարզվեց, որ դասավանդողների մեծ մասը ունի բնակարանի կարիք:
Դպրոցում աշխատող ուսուցիչը իր ստացած աշխատավարձով չի կարող սեփական միջոցներով լուծել բնակարանային հարցերը:
Խնդրում ենք Ձեզ գտնել հնարավորություններ և միջոցներ դասավանդողների և կրթահամալիրի մյուս աշխատակիցների բնակարանային հարցերը կարգավորելու համար` նրանց ազատելով մշտական սոցիալական լարվածություններից: »
Ի պատասխան 2011թ. ապրիլի 28-ին տեղի ունեցավ Հանրային Խորհրդի ֆինանսատնտեսական և բյուջետային հանձնաժողովի Տուրիզմի, առողջ ապրելակերպի, կուրորտների ենթահանձնաժողովի նիստ:
Նիստին մասնակցելու համար հրավիրվեցին «Մխիթար Սեբաստացի»կրթահամալիրի տնօրեն Աշոտ Բլեյանը և Արհեստակցական կազմակերպության նախագահ Հասմիկ Նալբանդյանը:
Օրակարգում քննարկվեց կրթահամալիրի դասավանդողների դիմումը`նրանց սոցիալական բնակարաններով ապահովելու խնդիրների մասին:
Շնորհակալություն հայտնելով ենթաժողովին հարցի հասարակական քննարկման համար, «Մխիթար Սեբաստացի»կրթահամալիրի տնօրեն Աշոտ Բլեյանը նկարագրեց իրավիճակը` հայտնելով, որ բնակարանային խնդիր ունեցող աշխատողները բաժանվում են երկու խմբի`վաստակաշատ ուսուցիչներ, ովքեր ապրում են խորհրդային տարիներին ստացած բնակարաններում և սերունդների հերթափոխության շնորհիվ նրանց տարածքը խիստ փոքրացել է և դժվարացել է համատեղ կյանքը, և երկրորդ խումբը երիտասարդ ուսուցիչներն են, ովքեր պետք է ամուսնանան կամ արդեն ամուսնացել են և բնակարանի խնդիր ունեն:
Նա առաջարկեց օգտագործել բոլոր հնարավորությունները և համապատասխան օղակների օրակարգային հարց դարձնել ուսուցիչներին սոցիալական բնակարանով ապահովելու խնդիրը:
Նա նաև առաջարկեց կառուցել թաղամասեր Երևանամերձ տարածքներում` երաշխավորելով նախաձեռնող կողմ հանդիսանալ և կայքի միջոցով հարցը հրապարակայնացնել:
Ամփոփելով հարցը, ենթաժողովի նախագահ Վ. Սաֆարյանը առաջարկեց հանդիպում կազմակերպել Երևանի քաղաքապետի հետ, ով միջոցներ կգտնի հողատարածք տրամադրելու հարցում, ինչպես նաև նամակ ուղարկել ՀՀ Կառավարություն և ՀՀ ԿԳ նախարարություն:
«Մխիթար Սեբաստացի»կրթահամալիրի
Արհեստակցական կազմակերպության նախագահ` Հասմիկ Նալբանդյան