Հոկտեմբերի 23-26-ը ավագ դպրոց-վարժարանի և գեղարվեստի դպրոցի տասը սովորողներ երեք ուսուցիչերի` Թամար Ղահրամանյանի, Տաթև Թամազյանի և Գոհար Բալջյանի հետ ուխտագնացության էին մեկնել Վրաստանի հանրապետություն` Ջավախք աշխարհի Գանձա գյուղ` Վահան Տերյանի հայրենիքը: Ուղևորությունը նախատեսված էր <<Վ. Տերյան>> նախագծի և <<Աշուն>> մեդիաօլիմպիադայի շրջանակներում: Մեզ` ուխտագնացներիս, դիմավորեցին Գանձայի Շոթա Ռուսթավելու անվան դպրոցի ուսուցչական կոլեկտիվը, տնօրենը և ողջ աշակերտությունը: Տնօրինության կողմից արդեն կազմակերպված էր գիշերակացի, էքսկուրսիաների և մյուս բոլոր խնդիրները: Եռօրյա այս հիշարժան ուղևորության ընթացքում մենք եղանք Ախալքալաքում, Ախալցխայում, տեսանք նորակառույց <<Ռաբաթ>> հոյակերտ ամրոցը, զմայլվեցինք Աբասթումանիի չքնաղ բնությամբ ու աշնան գույներով, Վարդիայում քայլարշավ կատարեցինք դեպի Թամար թագուհու քարանձավային պալատը, Տերյան ու Թումանյան ասմունքեցինք Փարվանա լճի ափին, զմայլվեցինք <<մեջք մեջքի տված Աբուլ ու Մթին>> լեռների շղթայով: Իսկական ընկերության մի հուզիչ պատկեր էր Սաղամո լճի ափին երեկոյան խարույկը, խորոված կարտոֆիլն ու երեխաների խենթ ծիծաղն ու մրոտ, բայց երջանիկ հայացքները: Տեսնել էր պետք, թե մեր երեխաները իրենց հասակակիցների հետ ինչ աշխուժությամբ էին պատրաստվում առավոտյան ընդհանուն պարապմունքին, ֆլեշ մոբին, վրացերենի նրանց խմբի հետ <<Սուլիկո>> երգում ու հանպատրաստից նվագակցում կիթառով: Դե իսկ մենք մեր գործընկերներին պատմում էինք մեր ծրագրերից, ցուցադրում մեզ հետ տարած նյութերը: Առիթ ունեցանք այցելելու նաև Վրաց լեզվի տուն Նինոծմինդայում, ծանոթացանք ազգությամբ հայ վրացերենի ուսուցչուհի Էլմիրա Գսպոյանի հետ, ներկայացրինք մեր ծրագրերը և կրթահամալիրի վրացալեզու կայքը, ապա նրանից ստացանք մի շարք դասագրքեր` վրացերենի ինքնուսույց հայերեն բացատրություններով, խաղերի քառալեզու գիրք և այլն: Սակայն մենք գնացել էինք որոշակի նպատակով` տեսնել բանաստեղծի հայրենի գյուղը, հանդիպել նրա շառավիղներին, այցելել նրա տուն-թանգարանը, համաձայնություն ձեռք բերել գանձացիների պատասխան այցի հետ կապված: Ավելացնեմ միայն, որ բոլոր պայմանավորվածությունները արված են, նյութերը` հավաքված, գանձացիները մեզ հյուր կլինեն նոյեմբերի 15-ից: Վերադարձին երթուղայինի մեջ մեր այցն ամփոփելիս բոլոր մասնակիցները միանշանակ նշում էին, որ ամենահիշարժանը իրենց նոր ընկերների հետ բարեկամությունն է, ու անհամբերությամբ սպասում են նոր հանդիպման Երևանում:
Դասավանդող` Թամար Ղահրամանյան