Հրաշագործ պապիկը

Հրաշագործ պապիկը

   Ով  է  Ձմեռ  Պապը:

   Ամանորի  ամենաբարի  այս  հերոսն  ունի  նախահայր `  սուրբ  Նիկողայոսը ,  որ  գրականություն  է  թափանցել  հին  դարերից  Նիկողայոս  Հրաշագործ  անունով:  Ասում  են,  թե  ծնողներից  ժառանգություն  ստանալով`  նա  իր  կարողությունը  բաժանել  է  կարիքավորներին:  Երազում  մարդկանց  հայտնվելով`  փրկել  է  նրանց  սովից,  ծովում  խորտակվելուց  և  բազում  այլ  փորձանքներից:  Հատկապես  հայտնի  է  աղքատության  մեջ  հայտնված  հոր  պատմությունը,  որն  իրեն  կորցրած`  պատրաստվում  էր  իր  երեք  դուստրերին  անառակության  դրդել:  Սուրբ  Նիկողայոսը  նրանց  տան  պատուհանի  գոգին  երեք  քսակ  ոսկի  է  դնում`  փրկելով  երեք  աղջիկների  պատիվը:  Այստեղից  էլ  առաջացել  է  Ամանորի  գիշերը  երեխաների  բարձի  տակ  նվերներ  դնելու  սովորույթը:

   Երեխան  Ձմեռ  Պապիկի  մասին  աղոտ  պատկերացում  է  սկսում  կազմել  մոտ  2  տարեկանից`  Ձմեռ  Պապի  տեսքով  խաղալիքների  կամ  ինչ-որ  ներկայացումների  միջոցով:  Այդ  պատկերացումները  հստակեցվում  են  4-5  տարեկանում,  երբ  երեխան  գիտակցում  է,  որ  Ամանորի  նվերները  բերում  է  Ձմեռ  Պապը:  9-10  տարեկան  հասակում  երեխաները  սովորաբար  շրջապատից  տեղեկանում  են,  որ  նվեր  բերող  Ձմեռ  Պապիկն  իրենց  իսկ  ծնողներն  են,  և  այստեղ  չքանում  է  այն  երազանքը,  որ  փայփայել  են  տարիներ  շարունակ:  Այս  ցավոտ  ճշմարտությունից  հետո,  այնուամենայնիվ,  հոգու  խորքում  ուզում  ենք  հավատալ  Ձմեռ  Պապի  գոյությանը  և  այդ  թերի  կամ  լիարժեք  հավատով  արդեն  ինքներս  ենք  դառնում  ծնողներ  ու  երբեմն  հայտնվում       Ձմեռ  Պապի  դերում:

    Ձմեռ  Պապի  մասին  պատկերացում  կազմելու հարցում   շատ  մեծ  է  ծնողների  դերը:  Հաճախ  նրանք  երեխային  սաստում  են`  ասելով,  որ    Ձմեռ  Պապը  նվերներ  չի  բերի  և  կպատժի:  Այս  դեպքում,  ահա,  Ձմեռ  Պապը  բարի  կերպարից  վերածվում  է  պատժող,  հետևող  աչքի,  որը  երեխային  անընդհատ  լարվածության  մեջ  է  պահում:

   Շատ  կարևոր  են  նաև  Ձմեռ  Պապի  պատրաստած  նվերները:  Երբեմն  երեխայի  ակնկալիքները  չեն  արդարանում,  և  նա  սկսում  է  մտածել,  որ  Ձմեռ  Պապն  ամենակարող  հրաշագործ  չէ:  Ծնողները  պետք  է  Ձմեռ  Պապի  կերպարը  ոչ  թե  իջեցնեն  կենցաղային  մակարդակի,  այլ  նրան  խորհրդավորություն  հաղորդեն:

   Պատահում  է,  որ  Ձմեռ  Պապի  անակնկալ  այցը  սարսափեցնում  է  փոքր  երեխաներին,  և  դրանից  հետո  նրանք  վախենում  են  բոլոր  մորուքավոր  մարդկանցից:  Անհրաժեշտ  է  երեխային  նախապատրաստել  Ձմեռ  Պապի  այցելությանը,  հաճախ  պատմել  նրա  մասին`  շեշտելով  արտաքին  տվյալները`  երկար  մորուքը,  կարմիր  քիթը,  հաստ  ձայնր:

                                                                     Բժիշկ - առողջագետ `  Նելլի  Այվազյան