Հայ առաքելական սուրբ եկեղեցին Հիսուս Քրիստոսի Ծննդյան և Աստվածահայտնության տոնը նշում է Հունվարի 6-ին: Ս. Ծննդյանը նախորդող շաբաթը պահքի շրջան է, որը սկսվում է դեկտեմբերի 30-ին և ավարտվում հունվարի 5-ի երեկոյան` Ճրագալույցի Ս. Պատարագով, երբ մենք միասնաբար մասնակցում ենք երեկոյան Ս. Պատարագին և մեր տներն ենք տանում Քրիստոսի ծննդյան ավետիսը և Քրստոսի լույսը:
Հունվարի 6-ին Պատարագի ավարտին կատարվում է ջրօրհնեքի արարողությունը, որը խորհրդանշում է մեր փրկչի՝ Հիսուս Քրիստոսի մկրտությունը: Ավարտին օրհնած ջուրը բաժանում են հավատացյալներին:
Հաջորդ օրը՝ Հունվարի 7-ին մեռելոց հիշատակի օր է, երբ մենք մասնակցում ենք Ս.Պատարագին, հոգեհանգստյան կարգին, աղոթում մեր ննջեցյալների հոգիների հանգստության համար և ապա այցելում նրանց շիրիմներին:
Հունվարի 13-ին` Տիրոջ Անվանակոչության օրն է , Մանուկ Հիսուսին` տաճարին ընծայելու, 8-րդ օրը թլպատվելու և անվանակոչվելու հիշատակի տոնը:
Ս. Ծննդյան ինչպես նաև Հարության տոներին մենք կատարում ենք հոգևոր բարեպաշտական արարողություններից տնօրհնեքի կարգը, երբ հոգևորականները Քրիստոսի առաքյալների օրինակով այցելում և օրհնում են մարդկանց տները, տան հացը, ջուրն ու աղը և ավետում Փրկչի Ծննդյան և Հարության ավետիսը: