Երկու շաբաթ, երկու հերթափոխով կազմակերպվեց «Հայաստանյան ասպետ» նախագիծը, որը կարելի է համարել Արցախի «Ասպետ» ճամբարի նախերգանք: Կրթահամալիրի 30 պատանիներ և նոր ընդունված սովորողներ մասնակցեցին այս փուլին:
Կարելի է ասել, որ հայաստանյան նախագիծը կատարեց իր առջև դրված հիմնական խնդիրները: Թերևս այն կաղաց մեկ ասպեկտում` շրջակա միջավայրի բարելավման աշխատանքների մասով: Հայաստանյան փուլի շրջանակում մասնակից սովորողներն ունեցան շարային նախապատրաստության դասընթացներ, վարժություններ վարժասարքերի վրա, մարզական խաղեր, բարձունքի հաղթահարում, իսկ այս ամենն ամփոփվեց գեղեցկուհի Սևանում: Իսկ Սևանը գեղեցկուհի էր ոչ միայն իր բնույթով, այլ նաև ափին հանգրվանած գեղեցկուհիներով:
Հայաստանյան փուլի աշխատանքում, կուզենայինք առանձնացնել զինղեկի պաշտոնի համար դիմած Արմենի աշխատանքը: Արմենը բավականին լավ և միանգամից ներառվեց աշխատանքներում, և կարելի է ասել՝ նրա շնորհիվ էր, որ ռազմամարզական մի շարք բաղադրիչներ կայացան: Առջևում մնացել են մի շարք տեխնիկական աշխատանքներ, որոնք կարծում եմ՝ կլուծվեն այս շաբաթվա ընթացքում: Կուզենայինք նաև անդրադառնալ մարզական կենտրոնի հետ համագործակցությանը: Իսկ մեր ճամփորդությունները բացառապես կազմակերպվեցին կրթահամալիրի միջոցներով ու հնարավորություն տվեցին ցանկացող սովորողներին ներառվել: Այսինքն` որևէ արհեստական խոչընդոտ չկար, որպեսզի ամեն ինչ անցներ հավուր պատշաճի: Ընդհանրապես, կարծում ենք, որ «Ասպետ» նախագիծը պետք է մասնակից սովորողների և նրանց ծնողների մոտ առաջացնի միայն երախտագիտության զգացողություն, քանի որ իր բոլոր դրական կողմերից բացի այն ազատում է մասնակիցներին բոլոր ֆինանասական պարտավորություններից: 21-րդ դարի կապիտալիստական աշխարհում (ականջդ կանչի, լենին), սա բացառիկ երևույթ է:
Դե, ինչ, առջևում Արցախն է` իր հրաշք էությամբ, որն այնքան ապրելու ու ստեղծագործելու ձիրք է տալիս այնտեղ այցելողներին:
«Մխիթար Սեբաստացի» կրթահամալիր ՊՈԱԿ
Հասցե` Հայաստան, Երևան, Հարավարևմտյան զանգված, Րաֆֆու 57 (տեսնել քարտեզի վրա)
Հեռ` +374 (10) 74 72 46 բջջ՝ +374 (91) 43 10 99
Էլ. փոստ` [email protected]
