Ապրիլի 30...
Այս օրը ծառայեց իր նպատակին: Մենք կարողացանք հանձնաժողովի դատին ներկայացնել մեր 6 ամիսների ընթացքում կատարած աշխատանքը: Թեման՝ «Մաքուր,ծաղկաշատ,կանաչապատ Ստեփանակերտ»: Հիմնականում ներկայացրեցինք մայրաքաղաքի մաքրությունը: Բազում զբոսաշրջիկների և սփյուռքահայերի կարծիքն է դա: Տիար Բլեյանը պնդեց. «Այդ կարծիքին եմ նաև ես»: Մենք գոհ էինք մեր պատրաստած նյութից և ելույթից, անհամբեր սպասում ենք վաղվան՝ մրցույթի ամփոփման արդյունքներին:
Մրցույթից հետո բարձր տրամադրությամբ մեր ավտոն սլացավ դեպի Գառնի-Գեղարդ:Մի տեսակ աղոթք էինք ուզում մրմնջալ առ Աստված,որ աշխարհում կան բարի մարդիկ, բարի գործեր և ուրախ ենք, որ մասնակիցն ենք...
Գառնիի տաճարից լսեցինք Ազատ գետի վշշոցը: Այն նման էր թախծոտ մեղեդու, որ հոգիդ տակնուվրա է անում: Գեղարդը կախարդական, վայրի գեղեցկություն ունի: Դդուկահարները, տեսնելով մեր շապիկների վրա գրված «Ստեփանակերտ»-ը, իրենց նվագով հրավիրեցին պարի.«Տեր Աստված,վեր-վերի պարեցինք,կարծես դղրդացին ժայռերը Գեղարդի»:
Ստեփանակերտի Աշոտ Ղուլյանի անվան հ.2 դպրոցի աշակերտուհի Մարիա Նազլուխանյան
ՈՒշագրավ է Երևանի քաղաքապետարանի պատմության թանգարանը:Բավականին հետաքրքիր էր հին Երևանի գծապատկերը,հին զարդերը,զենքերի տեսակները:Այս թանգարանը մի տեսակ տարբերվում էր մնացած թանգարաններից:Այնուհետև մեր քայլերը տարան «Եռաբլուր»: Հուզմունքը մեր կոկորդում՝ ոտքով հասանք Հիմնական դպրոց:
Ստեփանակերտի Աշոտ Ղուլյանի անվան հ.2 դպսարանի աշակերտ Դավիթ Պետրոսյան
Ես Ստեփանակերտի հ.11 ավագ դպրոցի էկոտուր 2015 թիմի անդամ եմ և առաջին անգամ եմ մասնակցում այս հետաքրքիր և «կանաչ» ապագա ունեցող նախագծին : Աշոտ Բլեյանի նախաձեռնած այս միջոցառումները կլինեն շարունակական, և դա ինձ շատ է ուրախացնում: Մեր ընտրած «Աղբի տեսակավորում և վերամշակում» թեմայի ուսումնասիրության արդյունքում տեղեկացանք այն մասին, որ մի քանի ամսից մեր Արցախում նույնպես կսկսվի աղբի վերամշակումը: Այս նախագիծը ինձ հնարավորություն տվեց ձեռք բերել նոր ընկերներ: Մի խոսքով ամեն ինչ հրաշալի է, և շատ կուզեի հաջորդ տարի էլ մասնակցել էկոտուրին:
Արսեն Գրիգորյան
Հ.Գ. Մենք դեռ ճանապարհին ենք... Մենք դեռ կպատմենք...