***
Ամպերը համբուրվում էին անամոթաբար
Երկնքի կապույտ վրանի մեջ,
Դու մեկնում էիր ձեռք եղբայրաբար
Սայթաքող լանջի փշերի մեջ:
Եվ լռության խորհուրդը խախտելով
Բազեն փետուրն էր մեզ նվիրում,
Իսկ արահետը արտասովոր
Մոլորվում էր ու խենթ հարցեր ծնում:
***
Վերադարձս նվիրում եմ ամբոխին տարատեսակ,
Որ սրահներն է լցնում իր գվվոցով նենգ
Ու ծնում արարչամերժ մարդատեսակ
Բնության հավերժական ընթացքի մեջ:
Վերադարձս նվիրում եմ լեռներին մարդաստեղծ,
Որ խոնարհվում են կամքի սամումին
Ու ծնում արարչամերձ մարդատեսակ
Բնության հավերժական հեղեղի մեջ:
Նժդեհյան ակրոստիքոս
Նետի´ր կրկին անդունդ բոլշևիկյան խաժամուժին,
Ժխտի´ր հավատուրացների բարբաջանքները սին,
Դեպ հաղթանակ պարզիր աջդ արարչահաճ,
Երթդ թող այս անգամ լինի միշտ աննահանջ:
Հանուն հայոց հույսի ելի´ր գերեզմանից,
Ի մարտ նետի´ր գայլավաշտերն ուխտյալ,
Ներկան կարոտ է քեզ Ցեղի տառապյալ: