Կիրակնօրյա քննարկում

Վայ, Մարիետ ջան, էդ հյուրը ես եմ: Ուրիշի վրա չկասկածես:

Չէ, տիար Գևորգ, որ չգրեիր էլ, գիտեի, որ դու կլինես: Էլ չեմ ասում, որ մենք բոլորս էլ հյուր ենք կյանքում: Տիար Գևորգ ջան, և քեզ հետ, և ուսուցիչների հետ առցանց քննարկումն արդեն սկսվել է: Դիտարկումներ, դիտողություններ ու առաջարկություններ եմ ստանում իմ էլեկտրոնային հասցեին: Շնորհակալություն, դու էլ ես մանրամասն նայել ու գրել ես ինձ:Ուսուցիչներն էլ են շատ ակտիվ գրում-առաջարկում: Քննարկումը էլ պոզով-պոչո՞վ է լինում: Շատ էլ լավ է: Մնում է սովորողներն ակտիվանան:

Ուսումնական ընդհանուր պարապմունքի կարգ Առաջարկ 1. Տարեկան ծրագիրը իրատեսակա՞ն է, կարծում եմ շաբաթականը լավ է ու թող հաստատի կրթական ծրագրի ղեկավարը: Առաջարկ 2. Գնահատման հետ կապված. մասնակցությունը՝ շատ լավ, բայց կան սովորողներ, ովքեր կազմակերպում են, վարում են, գուցե կարգում արտացոլվի, որ նրանք ուսումնահասարակական նախագիծ են անում ու գնահատվում են նաև դրա համար: Առաջարկ 3. Կարող ենք ավելացնել՝ ենթակայքում բացել էջ, որտեղ հավաքվում են ընդհանուր երգերը, բանաստեղծությունները, պարերը, կարաոկեները, նյութերը:

Նառ ջան, տարեկան ծրագրի հետ կապված տիար Գևորգն էլ է գրել, որ դրա կարիքը չկա, քանի որ ծրագիրը կազմվում է տարեկան օրացույցին համապատասխան, որը հաստատում է կրթահամալիրի մասնաժողովը:

Ինչ վերբերում է ուսումնական ճամփորդության (եթե շաբաթ օրն է դա` միանշանակ հայրենագիտական) ժամանակ բուժքրոջ ներկա լինելուն, համամիտ եմ տիկին Մարիետի հետ: Վահրամ ջան, երբ նոր էի սկսել ճամփորդել, 7 տարի առաջ մենք հատուկ դասընթաց անցանք` առաջին բուժօգնողի, 2 տարին մեկ դա հետևողականորեն ես թարմացնում եմ (ժամկետն այդքան է): Այ շաբաթօրյա ճամփորդությունների (և ընդհանրապես ճամփորդությունների) մասին բավականին մտածելու բան ունենք: Տիկին Մարիետ կփորձեմ ձևակերպել և կուղարկեմ ձեր հասցեին...

Իմ կարծիքով կարգում պետք է ավելի հստակ գրել, որ ուսումնական ճամփորդությունները կապվում են ուսումնական առարկաների ծրագրային բովանդակության հետ և նշել, թե ինչ նոր գիտելիքներ և կարողություններ են ձեռք բերվում ճամփորդության ընթացքում:

Ինչ մնում է առավոտյան պարապմունքների անցկացմանը, կարծում եմ, որ այս նոր ձևաչափը, որը որդեգրել ենք, աշխատող տարբերակ է: Պարզապես պետք է առավոտյան ծրագրին ուղղված պահանջները և չափորոշիչները հստակեցնել: Իսկ սովորողների պարտադիր մասնակցությանը համաձայն չեմ: Իմ կարծիքով, պիտի կարողանանք այնպիսի որակ տանք, որ սովորողը չպատկերացնի իր օրվա սկիզբն առանց առավոտյան պարապմունքի:

Վահրամ, առավոտյան պարապմունքների պարտադիր չլինելու մասին կարծիք էլի է եղել: Բայց ես դրա հետ չեմ համաձայնել: Ասեմ ինչու: Երբ մենք 8.30 դրեցինք պարատուն և Արշակի հետ դա կազմակերպեցինք, հայտարարեցինք, որ բոլոր ցանկացողները կարող են գալ: Սկզբում թվում էր` շատերը պիտի գան, դե ակտիվ ձև է, Արշակն էլ հավեսով է պարապում, ինչու պիտի ուսուցիչ-սովորող չգան, մի կես ժամ չուզենան իրար հետ պարել: Բայց արի տես` ոչ էլ եկան: Մի բան է` ինչ ես դու մտածում, մի այլ բան` ինչ է իրականում: Ընդհանուր պարապմունքում միավորող բան կա, որը կարծում եմ նաև պետք է պարտադրվի, ինչպես մշակույթը: Հակառակ դեպքում` մտավախություն ունեմ, որ ընդհանուր պարապմունքը կկազմալուծվի ու չի ծառայի իր նպատակին: Իսկ մյուս հարցում քեզ հետ համաձայն եմ. եթե շատ հետաքրքիր լինի, ճիգ չենք անի, որ բոլորը գան, գոնե ներկա-բացական չի լինի:

Մերի ջան, հասարակական նախագծերը ամենակարևորն են: Բոլորին նույն ժամը հարմար լինել չի կարող: Ամեն մեկն իրեն հարմար օրն ու ժամը պիտի ընտրի: Մեր նախագծերի համակարգողը ընկեր Քաջիկն է, մեր այգեպանը:

Տիկին Մարիետ ջան,նաև ընդհանուր պարապմունքների հետ կապված մի նկատառում կուզենայի անել:Ճիշտ կլիներ,որ պատասխանատու ուսուցիչները տարբեր սովորողների ընդգրկեին,ոչ թե ամեն անգամ նույն սովորողների խումբը լինի:Մի շրջան եղավ,որ հերթապահ դասարան սկզբունքն էր գործում, և մասնակցում էին տվյալ դասարանի գրեթե բոլոր սովորողները,իսկ հիմա ամբողջ պարապմունքը մի քանի սովորողների վրա է դրված:

Եղավ,տիկին Մարիետ ջան:

Ռիմա ջան, այն, որ սովորողներն այսքան պասիվ են, ինձ մտահոգում է: Չնայած` ուսուցիչների մի մասն էլ առանձնապես ակտիվ չէ:Տպավորությունն այնպիսին է, որ այս կարգերն իրենց չեն վերաբերում:

Տիկին Մարիետ ճիշտ եք:

Շնորհակալություն բոլոր մասնակիցներին: Լավ քննարկում էր: Ափսոս, որ մեր սովորողներն են քիչ մասնակցում նման քննարկումներին: